पुणे प्राईम न्यूज डेस्क: अजय देवगनच्या (Ajay Devgn) सुपरहिट सस्पेन्स थ्रिलर ‘दृश्यम’ च्या तिसऱ्या भागाची घोषणा अखेर करण्यात आली असून, या चित्रपटाची रिलीज डेटही जाहीर झाली आहे. याचा टीझर प्रदर्शित (Drishyam 3 Trailer) केला असून विजय साळगांवकर पुन्हा एकदा मोठ्या पडद्यावर परतणार असल्याने चाहत्यांमध्ये उत्सुकता आणि उत्साहाचं वातावरण आहे. मात्र तिसऱ्या भागात अक्षय खन्ना (Akshay Khanna) दिसणार का, हा प्रश्न सध्या चर्चेचा विषय ठरला आहे.
‘आखिरी हिस्सा अभी बाकी है…’
मेकर्सनी ‘आखिरी हिस्सा अभी बाकी है…’ या ओळींसह 1 मिनिट 13 सेकंदांचा टीझर व्हिडिओ प्रदर्शित केला आहे. या व्हिडिओमध्ये अजय देवगनचा प्रभावी आवाज ऐकायला मिळतो. विजय साळगांवकर आपल्या कुटुंबाबद्दल बोलताना मागील दोन भागांतील घटनांचा संदर्भ देतो. “जग मला अनेक नावांनी ओळखतं, पण मला त्याचा फरक पडत नाही. मागील सात वर्षांत घडलेल्या घटनांनी मला हे शिकवलं की प्रत्येकाचं सत्य वेगळं असतं. माझं सत्य म्हणजे माझं कुटुंब,” असं तो सांगतो. यामधून विजय अजूनही आपल्या कुटुंबासाठी खंबीरपणे उभा असल्याचं स्पष्ट होतं. व्हिडिओच्या शेवटी “कहाणी अजून संपलेली नाही… शेवटचा भाग अजून बाकी आहे” हे वाक्य प्रेक्षकांची उत्कंठा अधिक वाढवतं.
हेही वाचा: रणवीर सिंह अन् अक्षय खन्ना स्टारर ‘धुरंधर’ 500 कोटींच्या क्लबमध्ये; ‘या’ चित्रपटाचा विक्रम मोडीत
2 ऑक्टोबर 2026 रोजी प्रदर्शित होणार
‘दृश्यम 3’ चं दिग्दर्शन अभिषेक पाठक करणार असून हा चित्रपट 2 ऑक्टोबर 2026 रोजी प्रदर्शित होणार आहे. सध्या चित्रपटाच्या संपूर्ण कलाकारांविषयी अधिकृत माहिती जाहीर करण्यात आलेली नसली, तरी कथा ‘दृश्यम 2’ जिथे संपली होती तिथूनच पुढे सुरू होणार असल्याचं समजतं.
दरम्यान, तिसऱ्या भागात अक्षय खन्ना दिसणार का, हा प्रश्न सध्या चर्चेचा विषय ठरला आहे. मूळ मल्याळम कथेत नसलेला आयजी ऑफिसरचा रोल हिंदी आवृत्तीत समाविष्ट करण्यात आला होता आणि तो ‘दृश्यम 2’ च्या यशामागील महत्त्वाचा घटक ठरला. दुसऱ्या भागातील अनपेक्षित क्लायमॅक्सने प्रेक्षकांचे सर्व अंदाज चुकीचे ठरवले होते. त्यामुळे तिसऱ्या भागात अक्षय खन्नाचं पात्र असेल की नाही, याबाबत सस्पेन्स कायम आहे.
‘दृश्यम’ हा सुपरस्टार मोहनलाल यांच्या मल्याळम चित्रपटाचा हिंदी रीमेक आहे. 2015 मध्ये प्रदर्शित झालेल्या पहिल्या भागाने बॉक्स ऑफिसवर मोठं यश मिळवलं, तर 2022 मधील ‘दृश्यम 2’ नेही जोरदार कमाई केली. आता चार वर्षांनंतर तिसरा भाग येत आहे. विशेष म्हणजे मोहनलाल यांनी मल्याळम ‘दृश्यम 3’ चं शूटिंगही सुरू केलं असून, हा चित्रपट हिंदीतही प्रदर्शित होण्याची शक्यता आहे.
मल्याळम ‘दृश्यम 3’ जर हिंदीत रिलीज झाला, तर त्याचा अजय देवगनच्या ‘दृश्यम 3’ च्या बॉक्स ऑफिस कामगिरीवर काय परिणाम होईल, तसेच कथेत काही बदल असतील का, याबाबत चर्चा सुरू आहेत. मात्र, विजय साळगांवकरची कहाणी पुन्हा एकदा प्रेक्षकांना खिळवून ठेवेल, अशी अपेक्षा व्यक्त केली जात आहे.
