मुंबई: मराठी चित्रपट आणि नाट्यसृष्टीतील ज्येष्ठ आणि बहुमुखी अभिनेत्री दया डोंगरे (Daya Dongre) यांचे वयाच्या 85 व्या वर्षी निधन झाले. त्यांच्या निधनाने मराठी कलाक्षेत्रात मोठी पोकळी निर्माण झाली असून, सर्व स्तरांतून हळहळ व्यक्त होत आहे.
कलावारसा लाभलेल्या अभिनेत्री
दया डोंगरे यांचा जन्म 1940 मध्ये झाला. त्यांना अभिनयाचा वारसा पिढीजात मिळाला होता. त्यांची आई यमुताई मोडक नाट्यअभिनेत्री, आत्या शांता मोडक गायिका आणि पणजोबा कीर्तनकार होते. फर्ग्युसन कॉलेजमध्ये शिक्षण घेत असताना त्यांनी एकांकिका स्पर्धांमधून अभिनयाची सुरुवात केली आणि पुढे दिल्लीच्या नॅशनल स्कूल ऑफ ड्रामा मधून त्यांनी नाटकाचे शास्त्रशुद्ध शिक्षण घेतले. पती शरद डोंगरे यांच्या पाठिंब्याने लग्नानंतरही त्यांनी आपला अभिनय प्रवास सुरू ठेवला.
‘गजरा’मुळे मिळाली ओळख
दूरदर्शनवरील ‘गजरा’ या लोकप्रिय मालिकेमुळे दया डोंगरे घराघरात पोहोचल्या आणि प्रसिद्धीच्या झोतात आल्या. यानंतर त्यांनी मराठी आणि हिंदी चित्रपटसृष्टीत आपल्या अभिनयाचा ठसा उमटवला.
‘खाष्ट सासू’च्या भूमिकेसाठी विशेष ओळख
चित्रपट आणि मालिकांमध्ये त्यांनी साकारलेल्या नकारात्मक भूमिका विशेषतः ‘खाष्ट पण मजेशीर सासू’ च्या भूमिका खूप गाजल्या. ‘खट्याळ सासू नाठाळ सून’, ‘नकाब’, ‘लालची’,’नवरी मिळे नवऱ्याला’ यांसारख्या मराठी आणि हिंदी चित्रपटांमधील त्यांच्या भूमिका प्रचंड प्रभावी ठरल्या.
मालिका आणि नाटकांमध्येही दमदार काम
चित्रपटांबरोबरच त्यांनी ‘चार दिवस सासूचे’, ‘कुलदीपक’, ‘तुझी माझी जमली जोडी रे’, ‘नांदा सौख्य भरे’, ‘लेकुरे उदंड झाली’, ‘आवाहन’, ‘स्वामी’ अशा अनेक मालिका आणि नाटकांमध्येही लक्षवेधी भूमिका साकारल्या.
1990 च्या दशकात त्यांनी चित्रपटसृष्टीपासून संन्यास घेतला असला तरी, त्यांच्या दमदार अभिनयाने साकारलेल्या भूमिका आजही प्रेक्षकांच्या मनात कायम आहेत. त्यांच्या निधनाने मराठी कलाजगताचे एक अमूल्य रत्न हरपले आहे.
