पुणे : पुण्यात कोयता गँगने मागील काही दिवसांपासून नागरिकांमध्ये दहशत निर्माण केली असून गँगने पोलिसांची झोप उडवली आहे. त्यातच आज सोमवारी (ता.२३) मार्केटयार्ड परिसरात गाडी हळू चालव म्हटल्यामुळे दोन कोयता गँग आमने सामने आल्या. आणि दोन्ही गँगने कोयत्याने एकमेकांवर वार केले आहे. याप्रकरणी पोलिसांनी आत्तापर्यंत ७ जणांना अटक केली आहे. यामुळे पुण्यामध्ये कोयता गँगची दहशत कमी झाली नसल्याचे स्पष्ट होत आहे.
पिटुसिंग दुधानी (३८), अनिलसिंग सिकंदरसिंग टाक (२१), सिकंदरसिंग राजुसिंग टाक (४०), रोहित दुधानी (१९), दत्ता भिसे (२९), नितीन भिसे (१९), विजय भिसे (२४) अशी अटक करण्यात आलेल्या आरोपींची नावे आहेत.
पोलिसांनी दिलेल्या माहितीनुसार, दोन्ही गँग या एकाच परिसरात राहतात. आरोपी दत्ता भिसे याचा पुतण्या आकाश भिसे हा फिर्यादी टाक यांच्या घरासमोरुन भरधाव वेगाने मोटारसायकल घेऊन चालला होता. त्यावेळी टाक यांनी आकाश भिसे मोटारसायकल हळू चालवत जा, असे सांगितले.
दरम्यान, या गोष्टीचा राग मनात धरुन दत्ता भिसे व इतर ८ जण हातात कोयते व काठ्या घेऊन आले. त्यांनी टाक यांच्यावर कोयते फिरवत दहशत निर्माण करुन जीवे मारण्याचा प्रयत्न केला. खुलेआम कोयते घेऊन एकमेकांवर वार होत असल्याने कायदा व सुव्यवस्थेचा प्रश्न निर्माण झाला आहे.
