यवत पोलिस ठाण्याचे ‘स्टाईल आयकॉन’ पोलिस हवालदार संदीप कदम यांचे उपचारादरम्यान अखेर निधन , अंत्यसंस्कार लासुर्णे (ता. इंदापुर) येथे आज (सोमवारी) सायंकाळी पाच वाजता वाजता होणार.

विशाल कदम.
लोणी काळभोर (पुणे) : बारामती-भिगवण रस्त्यावरील हॉटेल अभिषेकसमोर शुक्रवारी (ता. 22) सायंकाळी साडेपाच वाजनेच्या सुमारास झालेल्या अपघातातील, जखमी पोलिस हवालदार संदीप जगन्नाथ कदम (वय 43, रा. बारामती मूळगाव – लासुर्णे ता. इंदापूर) यांचे उपचारादरम्यान अखेर सोमवारी (ता. २५) दुपारी निधन झाले. संदीप कदम यांच्यावर अंत्यसंस्कार लासुर्णे (ता. इंदापुर) येथे आज (सोमवारी) सायंकाळी पाच वाजता वाजता होणार आहेत.

संदीप कदम हे जिल्हा (ग्रामिण) पोलिस दलातील यवत पोलिस ठाण्यात मागील तीन वर्षापासुन कार्यरत होते. संदीप कदम पायी जात असताना, पाठीमागुन आलेल्या एका तीन चाकी टेम्पोने त्यांना जोरदार धडक दिली होती. यामध्ये कदम हे गंभीररित्या जखमी झाले होते. संदीप कदम यांना दोन दिवस पुण्यातील एका बड्या रुग्णालयात उपचारासाठी दाखल केले होते. तर काल (रविवार) दुपार पासुन त्यांच्यावर बारामती शहरातील एका खाजगी रुग्णालयात उपचार सुरु होते. उपचारादरम्यान आज (सोमवारी) दुपारी त्यांची प्राणज्योत मालवली.

इंदापुर तालुक्यातील लासुर्णे या गावचे रहिवाशी असलेल्या संदीप कदम यांनी बारामती शहर, जिल्हा (ग्रामीण) पोलिसांची स्थानिक गुन्हे अन्वेषण शाखा व लोणी काळभोर पोलिस ठाण्यात यापूर्वी कर्तव्य बजावलेले आहे. मागील तीन वर्षांपासून संदीप कदम हे यवत पोलिस स्टेशन अंतर्गत असलेल्या पाटस पोलिस चौकीत हवालदार म्हणून कार्यरत आहेत. संदीप कदम यांच्या पश्चात आई, वडील, पत्नी, तीन बहिणीसह एक मुलगा व एक मुलगी असा परीवा्र आहे.

 

पोलिस दलातील ‘स्टाईल आयकॉन’ हरपला..

दरम्यान संदीप कदम यांना व्यायामाबरोबरच वेगवेगळ्या स्टाईलमध्ये सेल्फी व फोटो काढण्याचा मोठा छंद होता. संदीप कदम यांचे फेसबुक अकाउंट पाहिल्यास त्यांच्या छंदाचा अंदाज येतो. पोलिस दलातील आपल्या सहकाऱ्यांबरोबरच संदीप कदम यांनी आपल्या मुला-मुलीबरोबरचे अनेक फोटो फेसबुकवर शेअर केल्याचे दिसून येते. तसेच पोलिस दलातील त्यांची कामगिरी पाहता ते ‘स्टाईल आयकॉन’ असल्याचाच अनुभव येतो. संदीप कदम यांच्या मृत्युती खबर मिळताच, पोलिस दलातील त्यांच्या अनेक सहकाऱ्यांना मोठा धक्काच बसला आहे.