loni kalbhor : शहरात लागू असलेल्या शस्त्रबंदी आदेशाचे उल्लंघन करत लोखंडी पालघन बाळगणाऱ्या 19 वर्षीय तरुणाला पुणे गुन्हे शाखेच्या पथकाने अटक केली आहे. पोलिसांनी ही कारवाई कदमवाकवस्ती (ता. हवेली) ग्रामपंचायत हद्दीतील एंजल स्कूलच्या मागील मोकळ्या मैदानात बुधवारी (ता.25) मध्यरात्रीच्या सुमारास केली आहे. या घटनेमुळे परिसरात खळबळ उडाली आहे.
करण दत्तात्रय पवार (वय 19, रा. संभाजीनगर, लोणी काळभोर) असे अटक करण्यात आलेल्या आरोपीचे नाव आहे.
या प्रकरणी गुन्हे शाखा, युनिट-06 चे पोलीस हवालदार प्रशांत दिलीप कर्णवर यांनी सरकारतर्फे लोणी काळभोर पोलिस ठाण्यात फिर्याद दिली आहे.
पोलीस निरीक्षक संदीपान पवार यांच्या आदेशानुसार कर्णवर, तानाजी देशमुख, प्रमोद टिळेकर आणि गणेश माने हे अधिकारी 25 मार्च रोजी रात्री उशिरा गुन्हे प्रतिबंधक गस्त घालत होते. गस्तीदरम्यान पथक एंजल स्कूलच्या मागील मैदानाजवळ पोहोचले असता एक युवक संशयास्पद हालचाली करत दगडांमध्ये काहीतरी लपवित असल्याचे पोलिसांच्या निदर्शनास आले. पोलिसांना पाहताच तो तेथून पळून जाण्याचा प्रयत्न करू लागला. मात्र पोलिसांनी तत्काळ पाठलाग करून पकडले.
चौकशीत त्याने आपले नाव करण दत्तात्रय पवार (वय 19, रा. संभाजीनगर, लोणी काळभोर) असे सांगितले. त्याच्या पायाखाली दगडांमध्ये लपवलेली वस्तू काढून पाहिली असता ती एक धारदार लोखंडी पालघन असल्याचे आढळले. पोलिसांनी पंचांच्या उपस्थितीत त्याची झडती घेतली असता 35 इंच लांबीचे हे शस्त्र त्याच्या ताब्यातून जप्त करण्यात आले.पोलिसांनी पवार यांना ताब्यात घेऊन अधिक चौकशी केली असता, आरोपीने हे पालघन मित्र राहुल काळे याच्याकडून आणल्याचे सांगितले.
दरम्यान, पुणे पोलिस आयुक्तालयाच्या हद्दीत 17 मार्च ते 30 मार्च दरम्यान कोणतेही शस्त्र बाळगण्यास बंदी असताना आरोपीकडे हे शस्त्र आढळल्याने त्याच्यावर गंभीर गुन्हा नोंदवण्यात आला आहे. या कारवाईदरम्यान जप्त केलेले पालघन पंचनामा करून सीलबंद करण्यात आले असून संपूर्ण प्रक्रिया ई-साक्ष अॅपद्वारे व्हिडिओ रेकॉर्ड करण्यात आली आहे. या प्रकरणी करण पवार याच्याविरुद्ध भारतीय हत्यार कायदा कलम 4(25) तसेच महाराष्ट्र पोलीस कायदा कलम 37(1)(3) सह 135 अंतर्गत गुन्हा दाखल करण्यात आला आहे.
