जालना : लग्नाच्या दिवशीच मुलीच्या काकाने मुलाकडील अर्धा एकर जमीन मुलीच्या नावावर करून मागितली, मात्र मुलाच्या नातेवाईकांनी देण्यास नकार दिल्याच्या कारणावरून व बदनामी झाल्याच्या कारणावरून पोटच्या मुलीला वडील व चुलत्याने जाळून मारल्याची घटना घडली. पीर पिंपळगाव (ता. जालना) येथे ही घटना बुधवारी (ता. १४) उघडकीस आली आहे. सूर्यकला संतोष सरोदे असे मुलीचे नाव आहे तर वडील संतोष भाऊराव सरोदे व चुलते नामदेव भाऊराव सरोदे अशी जाळून मारलेल्या दोन आरोपींची नावे आहेत.
पोलिसांनी दिलेल्या माहितीनुसार, सुर्यकला हि इयत्ता आकरावीच्या वर्गात शिकत होती. तसेच तिचे व तिच्या आत्याचे मुलाचे प्रेमसंबंध होते. यावेळी दोघेही घरातून निघून गेले होते. परंतु घरच्यांनी त्यांना लग्न करून देतो, असे सांगून पुन्हा घरी बोलावले होते. मंगळवारी एका मंदिरात संतोष व नामदेव सरोदे यांनी दोन्ही कुटुंबांना लग्नासाठी बोलावून घेतले. परंतु मुलीच्या काकाने अर्धा एकर शेती मुलीच्या नावावर करण्याची मागणी केली. त्याला नकार मिळाल्याने वडिलांसह काकाने सूर्यकलाला मंडपातून ओढत घरी आणले.
संतापलेल्या वडील व काकांनी मुलीला मंडपातून ओढत घरी आणले. बदनामीच्या रागातून त्या दोघांनी मुलीच्या गळ्याला दोर बांधून घराजवळच्या लिंबाच्या झाडावर लटकावले. दोघांनीच सरण रचून तिचा मृतदेह जाळला. तसेच दोन गोण्यांमध्ये राखही भरून ठेवली. त्या गोण्या गुरुवारी (ता. १५) तेथेच दिसून येत होत्या. सूर्यकला सरोदे हिच्या घरात शांतता दिसून आली.
दरम्यान, गावातील काही मंडळी भेटण्यासाठी येत होती. तिची आई घरात होती. त्यांच्या डोळ्यात अश्रू होते. तर बहिणीसह घरातील लहान मुले बाहेर बसलेली होती. घटनेच्या वेळी घरातील काही मंडळी हजर होती. परंतु कोणीही तिला वाचविण्याचा प्रयत्न का केला नाही? असा प्रश्न गावात चर्चिला जात आहे. संतोष सरोदे व नामदेव सरोदे या दोघांनाही तीन दिवसांची पोलिस कोठडी सुनावली आहे.
