Crime News: नवी मुंबई: कळंबोली (Kalamboli crime) उपनगरात माणुसकीला काळीमा फासणारी एक अत्यंत धक्कादायक घटना समोर आली आहे. कळंबोलीतील सेक्टर 1 मधील गुरूसंकल्प हाऊसिंग सोसायटीत जन्मदात्या आईनेच सहा वर्षांच्या चिमुरडीचा गुदमरून खून केल्याचा प्रकार उघडकीस आला आहे. या प्रकरणी कळंबोली पोलिसांनी संबंधित 30 वर्षीय महिलेला अटक केली असून घटनेमुळे संपूर्ण परिसरात खळबळ उडाली आहे. (Mother kills daughter)
हेही वाचा- चार तहसीलदारांसह दहा जणांचे निलंबन मागे; मावळ तालुक्यातील गौण खनिज प्रकरण
पोलिसांकडून मिळालेल्या माहितीनुसार, या सोसायटीत आयटी अभियंता पती आणि बीएस्सीपर्यंत शिक्षण घेतलेली पत्नी राहत होते. 2017 साली त्यांचा विवाह झाला होता आणि 2019 मध्ये त्यांना मुलगी झाली. मात्र, या मुलीला लहानपणापासून बोलण्यात अडथळा येत होता. ती मराठीपेक्षा हिंदी भाषेत अधिक बोलत असल्याने आई सतत नाराज असल्याचे तपासात समोर आले आहे. मुलगी व्यवस्थित बोलत नाही, तिला नको आहे, असे ती अनेकदा पतीकडे सांगत होती. पतीने अनेक वेळा तिला समज देण्याचा प्रयत्न केला होता.
पोलिस तपासानुसार, 23 डिसेंबरच्या रात्री महिलेने मुलीचा जीव घेण्याचा निश्चय केला. त्या दिवशी आजी नातीला भेटण्यासाठी भेटवस्तू घेऊन घरी आली होती, मात्र काही कारणामुळे तिची आणि मुलीची भेट झाली नाही. काही वेळाने पती घरी परतल्यानंतर मुलगी झोपेतून उठत नसल्याचे लक्षात आले. घाबरून कुटुंबीयांनी तिला तातडीने रुग्णालयात नेले. तेथे सुरुवातीला मृत्यू हृदयविकाराच्या झटक्याने झाल्याचा दावा करण्यात आला.
मात्र, कळंबोली पोलीस ठाण्याचे वरिष्ठ पोलीस निरीक्षक राजेंद्र कोते यांना हा मृत्यू संशयास्पद वाटला. त्यांच्या सूचनेनुसार शवविच्छेदन करण्यात आले. प्राथमिक अहवालात श्वसनमार्ग अडथळ्याचे संकेत मिळाल्यानंतर आई-वडिलांची कसून चौकशी करण्यात आली. सुमारे 6 तासांच्या चौकशीनंतर अखेर आईनेच मुलीचा गुदमरून खून केल्याची कबुली दिली. पोलिसांनी आरोपी महिलेला अटक करून पुढील तपास सुरू केला आहे. तसेच, या महिलेवर यापूर्वी मनोविकार तज्ज्ञांकडे उपचार सुरू असल्याची माहितीही समोर आली आहे.
