Crime News : बीड जिल्ह्यामधल्या केज तालुक्यात माणुसकीला काळिमा फासणारी एक संतापजनक घटना घडली आहे. एका १५ वर्षांच्या चिमुकलीला प्रेमाच्या जाळ्यात ओढून तिच्यावर अत्याचार केल्याचा प्रकार उघड झाला असून, पोलिसांनी आरोपीला बेड्या ठोकल्या आहेत.
नेमकी काय आहे घटना?
केज तालुक्यातील एका गावात राहणाऱ्या १५ वर्षांच्या अल्पवयीन मुलीची ओळख धीरज सांजुरे नावाच्या तरुणाशी झाली होती. धीरजने या ओळखीचा फायदा घेतला आणि तिला प्रेमाच्या जाळ्यात ओढलं. ७ जानेवारी २०२६ रोजी सकाळी जेव्हा ही मुलगी ट्युशनला जाण्यासाठी घराबाहेर पडली, तेव्हा धीरज तिथे कार घेऊन आला. ‘फिरायला जाऊ’ असं आमिष दाखवून त्याने तिला कारमध्ये बसवलं आणि एका निर्जन ठिकाणी नेलं.
तिथे कोणीही नसल्याची संधी साधून धीरजने या अल्पवयीन मुलीवर बळजबरीने अत्याचार केला. धक्कादायक बाब म्हणजे, महिनाभरापूर्वी सुद्धा त्याने तिला धारूर तालुक्यातील अंबाचोंडीच्या डोंगरात नेलं होतं, अशी माहिती समोर येत आहे.
मुलीने धाडस दाखवलं अन् नराधम अडकला
या प्रकारामुळे घाबरलेल्या मुलीने घरी परतल्यावर सर्व हकीकत आपल्या आई-वडिलांना सांगितली. आपल्या पोटच्या गोळ्यासोबत घडलेला हा भयानक प्रकार ऐकून पालकांच्या पायाखालची जमीनच सरकली. त्यांनी वेळ न घालवता मुलीला सोबत घेऊन केज पोलीस ठाणे गाठलं आणि तक्रार दिली.
पोलिसांची कडक कारवाई
तक्रार मिळताच केज पोलिसांनी वेगाने हालचाली केल्या. नराधम धीरज बाळासाहेब सांजुरे याच्यावर भारतीय न्याय संहिता (BNS) आणि ‘पोक्सो’ (POCSO) कायद्यांतर्गत गंभीर गुन्हे दाखल करण्यात आले आहेत. पोलिसांनी आरोपी धीरजला अटक केली असून, पोलीस आता या प्रकरणाचा अधिक तपास करत आहेत.
