Crime News : भर वस्तीत रिव्हॉल्व्हर नाचवणं महागात पडलं! शरद पवार गटाच्या उमेदवाराच्या घराबाहेर फिरणाऱ्या ‘त्या’ दोन पोलिसांचे निलंबन

Crime News : महापालिका निवडणुकीच्या गडबडीत लोकशाहीला धक्का देणारा एक गंभीर प्रकार समोर आला आहे. राष्ट्रवादी काँग्रेस (शरदचंद्र पवार गट) पक्षाच्या एका उमेदवाराच्या घरासमोर पोलिस गणवेशात, हातात रिव्हॉल्व्हर घेऊन फिरणाऱ्या दोन पोलिस कर्मचाऱ्यांचा व्हिडीओ व्हायरल झाला होता. या प्रकरणी अखेर त्या दोन्ही पोलिसांना निलंबित करण्यात आलं आहे. (Crime News)

व्हिडीओ सोशल मीडियावर व्हायरल झाल्यानंतर पोलिस यंत्रणाच अडचणीत आली असून, शहराच्या राजकारणात मोठी खळबळ उडाली आहे. या प्रकरणी तोफखाना पोलीस ठाण्यात सुहास शिरसाठ आणि अन्य दोघांविरोधात अदखलपात्र गुन्हा दाखल करण्यात आला आहे. निवडणुकीसारख्या संवेदनशील काळात पोलिसांकडून शस्त्रांचा निष्काळजी वापर होत असल्याचा आरोप केला जात आहे.

कर्तव्यात हलगर्जीपणा उघड

अजित पवार गटाचे आमदार संग्राम जगताप यांना सुरक्षा देणारे नीलेश भालसिंग आणि राघवेंद्र भालसिंग हे दोन पोलिस कर्मचारी आपलं कर्तव्याचं ठिकाण सोडून बोल्हेगाव परिसरात गेले होते. तसंच त्यांनी रिव्हॉल्व्हर अतिशय बेफिकीरपणे हाताळल्याचं प्राथमिक चौकशीत समोर आलं आहे. ही बाब गंभीर असल्याने जिल्हा पोलिस अधीक्षक सोमनाथ घार्गे यांनी तात्काळ निलंबनाचे आदेश दिले.

व्हिडीओ व्हायरल, वातावरण तापलं

शिवसेना (ठाकरे गट) उपनेत्या सुषमा अंधारे यांनी एक्स (ट्विटर)वर हा व्हिडीओ शेअर केला होता. या व्हिडीओमध्ये एका पोलिसाच्या हातात रिव्हॉल्व्हर स्पष्ट दिसत असून तो थेट उमेदवाराच्या घरासमोर उभा असल्याचा आरोप करण्यात आला. हा लोकशाही प्रक्रियेत दहशत निर्माण करण्याचा प्रयत्न असल्याचंही सांगण्यात आलं.

खासदार निलेश लंके आक्रमक

या प्रकरणाची दखल घेत खासदार निलेश लंके आणि राष्ट्रवादी काँग्रेस (शरदचंद्र पवार गट)च्या पदाधिकाऱ्यांनी पोलिस अधीक्षकांची भेट घेऊन तातडीने कठोर कारवाईची मागणी केली. त्यानंतर काही तासांतच संबंधित पोलिस कर्मचाऱ्यांवर निलंबनाची कारवाई करण्यात आली.

याबाबत पोलिस अधीक्षक सोमनाथ घार्गे यांनी सांगितलं की, सुरक्षेवर असलेल्या पोलिसांनी शस्त्र निष्काळजीपणे हाताळल्याचं चौकशीत आढळून आलं आहे. त्यामुळे ही कठोर कारवाई करण्यात आली आहे.

दरम्यान, व्हिडीओमध्ये दिसणाऱ्या इतर व्यक्तींवरही कारवाई व्हावी, अशी मागणी होत असून या घटनेमुळे अहिल्यानगरमधील राजकीय वातावरण अधिकच तापलं आहे. एका व्हायरल व्हिडीओमुळे पोलिस प्रशासनाला कठोर निर्णय घ्यावा लागल्याने ही घटना सध्या सर्वत्र चर्चेचा विषय ठरत आहे.