Crime : मुंबईतील मालाड परिसरातील मालवणी भागात एका विवाहित महिलेवर “मूल होत नाही” या कारणावरून करण्यात आलेल्या कथित छळाची धक्कादायक घटना समोर आली आहे. या प्रकरणात पोलिसांनी पतीसह 6 जणांविरुद्ध गुन्हा नोंदवला असून तपास सुरू आहे. या घटनेमुळे विवाहानंतर महिलांवर होणाऱ्या कौटुंबिक दबावाचा मुद्दा पुन्हा चर्चेत आला आहे.
तक्रारदार महिला शमीमबानो मोहम्मद शमीम शहा (वय 28) सध्या मालवणी परिसरात तिच्या बहिणीकडे राहत आहे. तिचा विवाह जानेवारी 2018 मध्ये मोहम्मद शमीम शहा याच्यासोबत झाला होता. लग्नानंतर सुरुवातीची 2 वर्षे सर्व काही सुरळीत होते. मात्र त्यानंतरही मूल न झाल्यामुळे घरातील वातावरण हळूहळू बदलू लागले, असा आरोप महिलेने केला आहे.
तिच्या म्हणण्यानुसार, पतीसह सासरच्या मंडळींकडून वारंवार “मूल होत नाही” या कारणावरून टोमणे मारले जात होते. काही वेळा अपमानास्पद बोलणे, मानसिक दबाव आणि मारहाणीचे प्रकारही घडल्याचा आरोप तिने केला आहे. या प्रकरणात पतीसह नणंद आणि इतर कुटुंबीय शबनम शहा, मैजबीन शहा, रोशनजहाँ शहा, सना खातून शहा आणि सासू सबुत्रिसा शहा यांच्यावर आरोप करण्यात आले आहेत.
दीर्घकाळ चाललेल्या या कथित छळामुळे मानसिकदृष्ट्या त्रस्त झालेल्या महिलेने अखेर मालवणी पोलिस ठाण्यात तक्रार दाखल केली. त्यानंतर पोलिसांनी 6 जणांविरुद्ध कौटुंबिक छळाचा गुन्हा नोंदवला आहे.
