पुणे : वयाने लहान आहे हे माहिती असूनही आई वडिलांनी अल्पवयीन मुलीचा विवाह (ता. शिरपूर) येथील आनंद ठाणसिंह भिल याच्याशी २०२१ मध्ये करून दिला होता. मुलगी प्रसूतीसाठी रुग्णालयात दाखल झाल्यानंतर हा प्रकार समोर आला.
जळोद (ता. शिरपूर) गावाजवळ उखळवाडी या वस्तीत मुलीचे माहेर आहे. तिचा पती ऊसतोड मजूर असल्यामुळे तो तिला घेऊन पुणे जिल्ह्यात आला. प्रसूतीवेदना होऊ लागल्यामुळे तिला २३ डिसेंबरला पुणे येथील ससून हॉस्पिटलमध्ये दाखल करण्यात आले. तिने बालकास जन्म दिला. दरम्यान, तिच्या वयाबाबत शंका आल्याने तेथील वैद्यकीय अधिकाऱ्यांनी चौकशी केली.
ती अल्पवयीन आहे हे सिद्ध झाल्यानंतर वैद्यकीय अधिकाऱ्यांनी वालचंदनगर पोलिस ठाण्याच्या अधिकाऱ्यांना त्याबाबत माहिती दिली. त्यांनी रुग्णालयात जाऊन तिचा जबाब नोंदवून घेतला. त्यावरून तिचा पती आणि आई-वडील यांच्याविरोधात गुन्हा दाखल करण्यात आला आहे.
तेथून तो गुन्हा शिरपूर शहर पोलिसांत वर्ग करण्यात आला. त्यानंतर पती आनंदसिंह भिल, वडील सुरेश भिल व आई सुंदरबाई भिल यांच्या विरोधात शहर पोलिस ठाण्यात गुन्हा दाखल करण्यात आला.उपनिरीक्षक संदीप मुरकुटे तपास करीत आहेत.
