Big Breaking | उरुळी कांचन, (पुणे) : तरडे – वळती रस्त्यावर वळती (ता. हवेली) ग्रामपंचायत हद्दीत एक भरलेला इंधनवाहू टँकर पलटी झाल्याची घटना शनिवारी (ता. १३) दुपारी साडेतीन वाजण्याच्या सुमारास घडली आहे. या घटनेने परिसरात घबराटीचे वातावरण निर्माण झाले असून अग्निशामक दलाचे कर्मचारी घटनास्थळी दाखल झाले आहेत.
मिळालेल्या माहितीनुसार, तरडे – वळती रस्त्यावर वळती ग्रामपंचायत हद्दीतील गावाच्या नजीक असलेल्या स्मशान भूमी येथे हा अपघात झाला. टँकर मधील इंधन गळती होत असल्याने रस्त्यावर दोन्ही बाजूची वाहतूक थांबवण्यात आली आहे. या अपघाताची माहिती मिळताच अग्निशामक दलाचे कर्मचारी घटनास्थळी दाखल झाले. पुढील अनर्थ टाळण्यासाठी वाहतूक बंद करून योग्य ती खबरदारी घेतली जात आहे.
दरम्यान सदर ठिकाणी क्रेनच्या सहाय्याने कंटेनर बाजूला करण्याचे काम सुरु आहे. मात्र टँकरमधून इंधन गळती होत असल्याने क्रेन चालकाने धोका होण्याची शक्यता असल्याने काम थांबविले आहे. अशी माहिती घटनास्थळावरून प्राप्त झाली आहे.
