भिगवण : तक्रारवाडी ग्रामपंचातीच्या हद्दीतील उजनी धरणाच्या बॅकवॉटरमध्ये धडापासून वेगळा केलेला एका अज्ञाताचा मृतदेह आढळून आला असून त्या मृतदेहाची ओळख पटविण्यासाठी भिगवण पोलिसांनी मयताच्या हातावरील टॅटू प्रसिद्ध केला आहे. या टॅटू संदर्भात माहिती असल्यास, भिगवण पोलिसांशी संपर्क साधण्याचे आवाहन करण्यात आले आहे.
पोलिसांकडून मिळालेल्या माहितीनुसार, अंदाजे ३० ते ३५ वय असलेल्या इसमाचा मृतदेह काल (ता. ९) उजनी धरणाच्या बॅकवॉटरमध्ये आढळून आला असून या इसमाचे डोके तीक्ष्ण हत्याराने धडावेगळे करण्यात आले आहे. मृत इसमाचे डोके फेकून देण्यात आल्याचा संशय पोलिसांना आहे. मृत व्यकतीचे दोन्ही हात खांद्यापासून तर पाय मांड्यापासून कापण्यात आलेले आहेत. हे अवयव प्लॅस्टिकच्या कागदामध्ये व निळ्या पांढऱ्या रंगाच्या पिशवीमध्ये भरून उजनीच्या बॅकवॉटरमध्ये फेकण्यात आले आहेत.
पोलिसांना सापडलेल्या मृतदेहाच्या तुकड्यांमध्ये मयताच्या उजव्या हाताच्या पाठीमागे पोटरीवर टॅटू आढळून आला आहे. तसेच मयताच्या अंगावर व्हीनस कंपनीची अंडरवेअर आढळून आली आहे. तक्रारवाडी गावाचे पोलीस पाटील अमर धुमाळ यांनी अज्ञात इसमाचा विरोधात तक्रार दाखल केली असून या तक्रारीनुसार गुन्हा दाखल करण्यात आला आहे. पुढील तपास पोलीस करत आहेत.
मयताच्या हातावरील टॅटू पोलिसांनी ओळख पटविण्यासाठी जाहीर केला असून याबाबत कुणाला काही माहिती मिळाल्यास पोलिसांना कळवावी, असे आवाहन भिगवण पोलिसांनी केले आहे. माहिती देणाऱ्याचे नाव गुप्त ठेवण्यात येणार असून, त्याला योग्य बक्षीस देखील दिले जाणार असल्याचे भिगवण पोलिसांनी सांगितले.
माहिती देण्यासाठी : १) भिगवण पोलीस स्टेशन : ०२१२/२४६२३३, २) दिलीप पवार, सहा. पोलीस निरीक्षक : ९८५०३०११३३, ३) रूपेश कदम, पोलीस उपनिरीक्षक : ८०८७७७५८२६ यांच्याशी संपर्क साधण्याचे आवाहन भिगवण पोलिसांकडून करण्यात आले आहे.
