Maharashtra Rain Update: पुणे : अरबी समुद्रात कमी दाबाचा पट्टा निर्माण झाल्याने सिंधुदुर्ग जिल्ह्यातील बहुतांश भागात मंगळवारी रात्रीपासून पावसाची संततधार सुरू आहे. सिंधुदुर्ग जिल्ह्याला आज यलो अलर्ट देण्यात आला आहे. काही ठिकाणी संततधार तर, काही ठिकाणी मुसळधार पाऊस कोसळत असल्याने बळीराजा चिंतातूर झाला आहे. ऐन भात कापणीच्या हंगामात पाऊस पडत असल्याने बळीराजा विवंचनेत सापडला आहे. भातशेतीला अवकाळी पावसाचा फटका बसण्याची चिंता आहे. कुडाळ, सावंतवाडी, वेंगुर्ले तालुक्यातील अनेक ठिकाणी विजांच्या कडकडाटासह अवकाळी पावसाची हजेरी पाहायला मिळत आहे.
कोल्हापूर जिल्ह्याच्या ग्रामीण भागात पावसाची हजेरी
कोल्हापूर जिल्ह्याच्या ग्रामीण भागातील राधानगरी, भुदरगड तालुक्यात पावसाची रिमझिम सुरु आहे. सांगली जिल्ह्यातील वातावरणातही लक्षणीय बदल झाला आहे. जिल्हाभर ढगाळ वातावरण तर, काही भागात पावसाच्या जोरदार सरी कोसळत आहेत. पलूस भागात पहाटेपासून मुसळधार पाऊस सुरु असून, जत तालुक्यातील उमदी भागात देखील पाऊस झाला आहे. या अवकाळी पावसाने द्राक्ष बागांसह अन्य पिकांवर रोगाचा धोका निर्माण झाला आहे.
गोव्यात गडगडाटासह पावसाची शक्यता
गोवा वेधशाळेच्या अंदाजानुसार, दिवसभर पावसाची शक्यता वर्तवण्यात आली आहे. तसेच, आगामी तीन ते चार तासांमध्ये उत्तर गोवा आणि दक्षिण गोवा या जिल्ह्यांमध्ये गोव्यात गडगडाटासह मध्यम ते जोरदार पाऊस होऊ शकतो. या काळात ४० ते ६० किलोमीटर प्रतीतास वेगाने वारे वाहतील, असाही अंदाज गोवा वेधशाळेने वर्तवला आहे.
बेळगावात भात पिकाचे नुकसान
बेळगावात दीड तासाहून अधिक काळ अवकाळी पाऊस सुरू होता. यामुळे बेळगावकरांची तारांबळ उडाली. जोरदार पावसामुळे सखल भागात पाणी साठल्याचे पाहायला मिळाले. सध्या भात पिकाची कापणी सुरू झाली आहे. भात कापून शेतात ठेवलेल्या भात पिकाचे नुकसान झाले आहे.
