Todays Weather : देशभरात वातावरणात मोठा बदल होताना दिसत आहे. मोठ्या चक्रीवादळाचा इशारा दिल्यानंतर पुन्हा एकदा पावसाची शक्यता निर्माण झाली आहे. काही दिवसांपूर्वी थंडीचा जोर जाणवत होता, पण चक्रीवादळामुळे अनेक भागात हवामान बदलणार असून मुसळधार ते अतिमुसळधार पाऊस पडू शकतो. हे चक्रीवादळ सध्या श्रीलंकेच्या किनाऱ्याजवळ आणि बंगालच्या उपसागरात आहे. पुढील २४ ते ४८ तासांत ते भारतात धडकण्याची शक्यता हवामान खात्याने व्यक्त केली आहे. त्यामुळे तामिळनाडू, पुद्दुचेरी, आंध्र प्रदेश आणि रायलसीमा या किनारी भागांमध्ये 29 नोव्हेंबर ते 1 डिसेंबरदरम्यान मोठा पावसाचा इशारा जारी करण्यात आला आहे. कोकण किनारपट्टीवरही काही ठिकाणी पाऊस पडण्याची शक्यता आहे. Todays Weather
पावसासोबत जोराचे वारे वाहणार असल्याने खबरदारी घेण्याचं आवाहन करण्यात आलं आहे. दुसरीकडे, देशातील काही भागांत पावसाचा इशारा असला तरी महाराष्ट्रात मात्र गारठा कायम राहणार आहे. राज्यात 2 ते 3 डिसेंबरपर्यंत थंडी टिकेल असा अंदाज आहे. मागील काही दिवसांपासून मुंबईत पुन्हा गारवा जाणवत आहे. भंडाऱ्यात तर राज्यातील सर्वात कमी म्हणजे 10 अंश तापमानाची नोंद 28 नोव्हेंबरला झाली. चक्रीवादळाचा काहीसा परिणाम राज्यातही जाणवणार असून ढगाळ वातावरणासह विदर्भातील काही भागांत हलका पाऊस पडण्याची शक्यता आहे.
हवामान खात्याच्या माहितीनुसार, श्रीलंकेच्या किनारपट्टी आणि नैऋत्य बंगालच्या उपसागरावर तयार झालेलं वादळ ताशी सुमारे 4 किमी वेगाने उत्तर-वायव्येकडे सरकत आहे. 28 नोव्हेंबरला दुपारी हे वादळ त्रिंकोमालीपासून सुमारे 30 किमी नैऋत्य दिशेला होतं. दक्षिण भारतातील अनेक राज्यांमध्ये मुसळधार पावसाची शक्यता असताना उत्तर भारतात थंडीचा कडाका वाढलेला दिसत आहे.
तर,भारतीय हवामान विभागाच्या (IMD) अंदाजानुसार, आज, २९ नोव्हेंबर २०२५ रोजी पुण्यात आकाश प्रामुख्याने निरभ्र राहील.
पुण्यासाठी IMD अंदाज: २९ नोव्हेंबर २०२५
हवामान: आकाश प्रामुख्याने निरभ्र.
कमाल तापमान: २९°C.
किमान तापमान: १५°C.
पाऊस: पावसाचा अंदाज नाही.
