श्रीहरिकोटा: भारतीय अंतराळ संशोधन संस्था अर्थात इस्रोने (ISRO LVM3-M61) आज सकाळी 8:54 वाजता अमेरिकेच्या एएसटी स्पेसमोबाइल कंपनीचा ब्लूबर्ड ब्लॉक-2 हा उपग्रह इस्रोच्या शक्तिशाली एलव्हीएम3-एम6 रॉकेटद्वारे यशस्वीरित्या प्रक्षेपित केला आहे. या मोहिमेमुळे जागतिक स्तरावर भारताची व्यावसायिक प्रक्षेपणाची क्षमता पुन्हा एकदा सिद्ध झाली आहे. श्रीहरिकोटा येथील सतीश धवन अंतराळ केंद्रातून या रॉकेटने अवकाशात उड्डाण केले आणि नियोजित वेळेत उपग्रहाला पृथ्वीच्या खालच्या कक्षेत यशस्वीरित्या पोहोचवले.
हा उपग्रह तांत्रिकदृष्ट्या अतिशय विशेष आहे, कारण याचे वजन सुमारे 6100 किलो असून एलव्हीएम3 रॉकेटने आतापर्यंत अवकाशात नेलेले हे सर्वात वजनदार पेलोड ठरले आहे. या उपग्रहाचे मुख्य वैशिष्ट्य म्हणजे याचा 223 चौरस मीटरचा विशाल अँटेना. हा अंतराळातील आतापर्यंतचा सर्वात मोठा व्यावसायिक संप्रेषण अँटेना मानला जात आहे. या तंत्रज्ञानामुळे जगातील अशा दुर्गम भागात जिथे मोबाईल टॉवर्स नाहीत, तिथे थेट स्मार्टफोनवर हाय-स्पीड इंटरनेट आणि 5G सेवा मिळणे शक्य होणार आहे. यामुळे मोबाईल कनेक्टिव्हिटीच्या क्षेत्रात मोठी क्रांती अपेक्षित आहे.
न्यूस्पेस इंडिया लिमिटेड आणि अमेरिकन कंपनीमधील व्यावसायिक करारानुसार ही मोहीम पार पडली. एलव्हीएम3 हे इस्रोचे सर्वात भरवशाचे रॉकेट असून याचे हे सलग सहावे यशस्वी व्यावसायिक उड्डाण आहे. या रॉकेटला त्याच्या अवाढव्य ताकदीमुळे बाहुबली रॉकेट असेही म्हटले जाते. सुमारे 43.5 मीटर उंच असलेल्या या रॉकेटने 600 किलोमीटरच्या उंचीवर उपग्रहाला तैनात केले आहे. या यशामुळे आगामी काळात भारत जागतिक व्यावसायिक सॅटेलाईट मार्केटमध्ये अधिक मोठी भूमिका बजावण्यासाठी सज्ज झाला आहे.
