सोलापूर: सोलापूर (ST Bus Conductor) जिल्ह्यातील मंगळवेढा तालुक्यात एसटी कंडक्टरच्या निष्ठुरपणामुळे पाचवीत शिकणाऱ्या एका चिमुरड्याला भर हायवेवर बसमधून खाली उतरवल्याची संतापजनक घटना घडली आहे. ब्रह्मपुरी येथील प्रथमेश राहुल पाटील हा मुलगा शाळा सुटल्यानंतर एसटी बसने घरी जात होता. प्रवासादरम्यान कंडक्टरने पास विचारला असता तो घरी विसरल्याचे प्रथमेशच्या लक्षात आले. मुलाकडे तिकीटासाठी पैसे नसल्याने त्याने वडिलांना फोन करून पैसे देण्याची विनंती केली, मात्र कंडक्टरने त्याचे काहीही न ऐकता त्याला निर्जन हायवेवर उतरवून दिले.
विशेष म्हणजे बसमधील एका महिला प्रवाशाने मुलासाठी 15 रुपये देण्याची तयारी दर्शवली होती, तरीही 11 रुपये कमी पडतात असे म्हणत कंडक्टरने त्या मुलाला बसबाहेर काढले. हायवेवर एकटाच राहिल्याने प्रथमेश प्रचंड घाबरला आणि रडू लागला, अखेर एका दुचाकीस्वाराने त्याला लिफ्ट देऊन घरी पोहोचवले.
या घटनेनंतर मुलाच्या पालकांनी मंगळवेढा आगार प्रमुखांकडे लेखी तक्रार केली आहे. आगार प्रमुखांनी दोषी कर्मचाऱ्यावर कारवाई करण्याचे आश्वासन दिले असून या घटनेमुळे संपूर्ण परिसरात एसटी प्रशासनाविरुद्ध संताप व्यक्त केला जात आहे.
