Sangli Crime: सांगलीच्या गारपीर चौक परिसरात मंगळवारी रात्रीच्या सुमारास उशिरा झालेल्या दुहेरी हत्याकांडामुळे जिल्ह्यात मोठी खळबळ उडाली आहे. दलित महासंघ चे संस्थापक अध्यक्ष उत्तम मोहिते (वय 38) यांची वाढदिवसाच्या पार्टीत आठ जणांच्या टोळक्याने निर्घृण हत्या केली. भांडणे सोडवण्यासाठी मध्ये आलेल्या त्यांच्या पुतण्यालाही हल्लेखोरांनी गंभीर जखमी केले आहे. (Sangli Crime Latest News)
वाढदिवसाच्या कार्यक्रमात घुसून हल्ला
पोलिसांनी दिलेल्या माहितीनुसार, उत्तम मोहिते यांचा मंगळवारी वाढदिवस असल्याने गारपीर चौक परिसरात त्यांच्या घराशेजारी मोकळ्या जागेत भोजन समारंभाचे आयोजन करण्यात आले होते. याच कार्यक्रमादरम्यान गणेश मोरे आणि त्याच्या सात साथीदारांनी धारदार शस्त्रांनी हल्ला केला.
उत्तम मोहिते यांच्या घरी जेवण सुरू असताना, गणेश मोरे आणि त्याचे साथीदार कार्यक्रमाच्या ठिकाणी आले. तेंव्हा त्यांना आत प्रवेश देण्यावरून वाद झाला. उत्तम मोहिते यांच्या पुतण्याने, योसेफ सतीश मोहिते (वय 21) याने मध्यस्थी करण्याचा प्रयत्न केला.
ते आठ आरोपी कोण?
या वादानंतर काही वेळाने गणेश मोरे, सतीश लोखंडे, शाहरूख शेख, बन्या उर्फ यश लोंढे, अजय घाडगे, जितेंद्र लोंढे, योगेश शिंदे आणि समीर ढोले (सर्व रा. इंदिरानगर, सांगली) हे आठ आरोपी चाकू, लोखंडी रॉड, काठी आणि धारदार शस्त्रे घेऊन पुन्हा घटनास्थळी आले. त्यांनी थेट घरात घुसून उत्तम मोहिते यांच्यावर पोटात, छातीवर, डोक्यात, आणि हातावर वार करून त्यांना जागीच ठार केले.
मोहिते यांना वाचवण्यासाठी मध्ये आलेल्या पुतण्या योसेफ मोहिते यालाही हल्लेखोरांनी “तुलाही जिवंत ठेवत नाही” असे धमकावून त्याच्या छातीवर गणेश मोरे याने वार केला. या हल्ल्यात योसेफ गंभीर जखमी झाला असून त्याला रुग्णालयात दाखल करण्यात आले आहे.
या प्रकरणी पोलिसांनी तक्रार दाखल करून घेतली आहे. शहरातील शांतता भंग करणाऱ्या या घटनेने नागरिकांमध्ये भीतीचे वातावरण निर्माण झाले आहे. आरोपींचा शोध घेण्यासाठी पोलिसांची पथके रवाना करण्यात आली असून पुढील तपास सुरू आहे.
