प्रतिनिधी अमित मुंडीक
पुणे: ‘मोका’ (MCOCA) गुन्ह्यातील गेल्या चार महिन्यांपासून फरार (Pune News) असलेल्या आरोपीला पोलिसांनी अखेर अटक केली आहे. कुख्यात गुंड निलेश घायवळ टोळीशी संबंधित असलेल्या अमोल दत्तात्रय लाखे (वय 27, रा. इटखेडा, छत्रपती संभाजीनगर) याला सोलापूर जिल्ह्यातील बार्शी येथून ताब्यात घेण्यात आले.
आरोपी अमोल लाखे याच्यावर वारजे माळवाडी पोलीस स्टेशन (गु.र.नं. 417/2025) आणि कोथरुड पोलीस स्टेशन (गु.र.नं. 277/2025) अंतर्गत गंभीर कलमांसह ‘मोका’ कायद्यान्वये गुन्हे दाखल आहेत. याशिवाय, गु.र.नं. 430/2025 मध्ये टेलिकम्युनिकेशन ॲक्टनुसारही त्याच्यावर गुन्हा नोंदवण्यात आला आहे. गुन्हा केल्यापासून तो पोलिसांना चकवा देऊन फरार झाला होता.
25फेब्रुवारी 2026 रोजी वारजे माळवाडी पोलीस ठाण्याचे तपास पथक प्रमुख, पोलीस उपनिरीक्षक संजय नरळे यांना गोपनीय बातमीदाराकडून आरोपी बार्शी येथे लपून बसल्याची खात्रीशीर माहिती मिळाली. वरिष्ठ पोलीस निरीक्षक महेश बोळकोटगी यांच्या मार्गदर्शनाखाली पथकाने तातडीने हालचाली करत 26 फेब्रुवारी रोजी पहाटे बार्शी येथे छापा टाकून आरोपीला अटक केली. प्राथमिक चौकशीत आरोपीने संबंधित गुन्ह्यांची कबुली दिली आहे. तो वारजे माळवाडी व कोथरुड पोलीस ठाण्यातील दोन स्वतंत्र ‘मोका’ गुन्ह्यांमध्ये ‘वाँटेड’ होता.
ही यशस्वी कारवाई अप्पर पोलीस आयुक्त (पश्चिम प्रादेशिक विभाग) राजेश बनसोडे, पोलीस उपायुक्त (परिमंडळ ३) संभाजी कदम, सहायक पोलीस आयुक्त सुजाता तानवडे (कोथरुड विभाग) आणि अजय परमार (सिंहगड विभाग) यांच्या मार्गदर्शनाखाली पार पडली. वरिष्ठ पोलीस निरीक्षक महेश बोळकोटगी व पोलीस निरीक्षक (गुन्हे) प्रकाश धेंडे यांच्या सूचनेनुसार पोलीस उपनिरीक्षक संजय नरळे व त्यांच्या पथकाने ही कामगिरी केली.
