शिरूर: अहिल्यानगर-पुणे जिल्ह्याच्या सीमेवर दाणेवाडी (ता.श्रीगोंदा,जि.अहिल्यानगर) येथील माऊली गव्हाणे याच्या क्रूर खून प्रकरणी अहिल्यानगर स्थानिक गुन्हे अन्वेषण विभागाने दाणेवाडी येथूनच आज (दि 16 )रात्री एका आरोपीला अटक केली आहे. सागर दादाभाऊ गव्हाणे (वय- 20 वर्ष, रा.दाणेवाडी, ता.श्रीगोंदा, जि. अहिल्यानगर) असे आरोपीचे नाव असून त्याने खुनाची कबुली दिली आहे.
अधिक माहितीत अशी की, आरोपी सागर गव्हाणे याला अहिल्यानगर स्थानिक गुन्हे अन्वेषण विभागाच्या पोलीस पथकाने अटक केली असून, त्याने गुन्हा केल्याची कबूली दिली आहे. त्यामुळे अहिल्यानगर पोलिसांना दाणेवाडी येथील क्रूर खूनाचा छडा लावण्यास यश आले असून,दुसरा प्रमुख आरोपीही दाणेवाडीचाच आहे. त्याचाही शोध सुरू असल्याचे पोलिसांनी सांगितले.
सदरची घटना समलैंगिकतेतून झाली असून, सागर गव्हाणे व दाणेवाडी येथील दुसरा युवक यांचे समलैंगिक संबंध होते आणि ते संबंध माऊली गव्हाणे यास माहिती होते. त्यामुळे सागर गव्हाणे व त्याच्या मित्रांनी माऊली गव्हाणे याचा इलेक्ट्रिक कटरच्या सहाय्याने निर्घृण खून केला. अशी माहिती पोलिस सूत्रांनी दिली.
तसेच या घटनेमध्ये आणखी तीन आरोपी असल्याचे पोलिसांनी सांगितले आहे. त्यांचाही शोध सुरु असून, त्यांच्याही मुसक्या लवकरच आवळल्या जातील असे अहिल्यानगर पोलिसांनी सांगितले.
सदर गुन्ह्याचा तपास अहिल्यानगर जिल्ह्याचे पोलीस अधिक्षक राकेश ओला , अपर पोलिस अधीक्षक प्रशांत खैरे, उपविभागीय पोलिस अधिकारी, कर्जत विभाग, विवेकानंद वाखारे यांच्या सूचना व मार्गदर्शनाखाली स्थानिक गुन्हे शाखेचे पोलिस अधिकारी व अंमलदार यांनी केला.
