Maharashtra Assembly Election 2024 : राज्याचं लक्ष लागून असलेल्या सांगली जिल्ह्यातील विधानसभा निवडणुकीचा निकाल समोर येत आहे. इस्लामपूर विधानसभा मतदारसंघात 11 व्या फेरीअखेर जयंत पाटील 13 हजार 500 मतांनी विजयी झाले आहेत. तर राष्ट्रवादी काँग्रेस अजित पवार गटाचे उमेदवार निशिकांत पाटील यांचा पराभव केला आहे.
इस्लामपूर मतदारसंघावर सलग 35 वर्षे जयंत पाटील यांचे नेतृत्व आहे. त्यांनी आपल्या कारकिर्दीत इस्लामपूर-आष्टा शहरासह मतदारसंत विविध विकासकामांसाठी निधी आणला. सहकार क्षेत्रातील साखर उद्योगाला गती दिली. ग्रामीण भागातून शहरी भागात येणा-या रस्त्यांसाठी कोट्यवधी रुपयांचा निधी उपलब्ध केला. इस्लामपूर शहरात 2477 पाणी योजना, भुयारी गटारी, घरकुल, बगीचे आदी विकास केला.
लोकसभा निवडणुकीमध्ये सांगली पॅटर्न राबवून अपक्ष उमेदवार विशाल पाटील यांना निवडून दिलेल्या सांगलीमध्ये यंदा चुरशीने निवडणूक झाल्याचं दिसून आलं. अडीच वर्षांमध्ये झालेल्या राजकीय उलथापालथी, सत्तासंघर्ष, पक्षफुटी यामुळे महाराष्ट्राचे राजकारण ढवळून निघाले आहे. या पार्श्वभूमीवर, 20 नोव्हेंबर रोजी राज्यात विधानसभा निवडणुकीचे मतदान पार पडल्यानंतर आज 23 नोव्हेंबर 2024 रोजी निकाल जाहीर होत आहेत.
