सातारा: सातारा (Crime News) जिल्ह्यातील कराडमध्ये एक धक्कादायक घटना घडली आहे. कराड विमानतळ परिसरात एका डॉक्टरने महिला रुग्णासोबत अश्लील वर्तन केल्याचा गंभीर आरोप आहे. संतापलेल्या नातेवाईकांनी डॉक्टरला बेदम मारहाण केली. एवढेच नाही, तर जमावाने रुग्णालयाची देखील मोठी तोडफोड केली. कराड शहर पोलीस ठाण्यात याप्रकरणी गुन्हा दाखल करण्यात आला आहे.
मिळालेल्या माहितीनुसार, शुक्रवारी दुपारी पीडित महिला आपल्या सासूसोबत उपचारासाठी एका दवाखान्यात गेली होती. तिथे डॉ. अल्ताफ हुसेन उस्मानसा नदाफ याने तपासणी करण्याच्या आणि इंजेक्शन देण्याच्या बहाण्याने, दवाखान्यातील पडदा ओढून विवाहितेशी गैरवर्तन करण्याचा प्रयत्न केला. या घृणास्पद प्रकाराने घाबरलेल्या महिलेने त्यावेळी आपल्या सासूला याबद्दल काहीही सांगितले नाही.
डॉक्टरच्या या कृत्यानंतर, विवाहितेने माहेरी जाऊन आपल्या आईला घडलेला सर्व प्रकार सांगितला. तसेच, तिने परगावी असलेल्या पतीलाही फोन करून ही घटना कळवली.
शनिवारी दुपारी 1 (एक) वाजण्याच्या सुमारास, डॉक्टरला जाब विचारण्यासाठी विवाहितेचे नातेवाईक आणि मोठ्या संख्येने ग्रामस्थ दवाखान्यात जमा झाले. डॉक्टरला पाहताच संतापलेल्या जमावाने त्याला बेदम चोप दिला. डॉक्टरने पळून जाण्याचा प्रयत्न केला, पण त्याला रोखून धरण्यात आले.
पोलिस पोहोचल्यानंतर डॉक्टरला पोलिसांच्या ताब्यात देण्यात आले असून पोलिस या प्रकरणी अधिक चौकशी करत आहेत. पोलीस उपअधीक्षक राजश्री पाटील या प्रकरणाचा पुढील तपास करत आहेत.
