लोणी काळभोर, ता. 23: तु काल आमच्या विरुध्द पोलीसात तक्रार का दिली, तुम्हाला आम्ही आता जिवंत सोडणार नाही, असे म्हणून जुन्या वादाचा राग मनात धरून एका कुटुंबाला लोखंडी गज, लोखंडी हत्यार व दगडाने बेदम मारहाण करून जीवे ठार मारण्याची धमकी दिल्याची घटना घडली आहे. ही घटना थेऊर (ता. हवेली) ग्रामपंचायत हद्दीतील चव्हाण वस्ती परिसरात शनिवारी (ता. 22) सकाळी सात वाजण्याच्या सुमारास घडली आहे. या मारहाणीत एकाच कुटुंबातील 5 जण जखमी झाले आहे तर लोणी काळभोर (Loni Kalbhor) पोलीस ठाण्यात 3 जणांवर विविध गंभीर कलमान्वये गुन्हा दाखल करण्यात आला आहे.
आयनाबाई दिलीप चव्हाण (वय 55) त्यांचे पती दिलीप चव्हाण, मुलगा शेखर चव्हाण, सून पुजा चव्हाण व मुलगी उज्ज्वला सावंत अशी जखमी झालेल्यांची नावे आहेत. तर अरुण छबू चव्हाण, पुनम राजू धांदे व अर्जुन अरूण चव्हाण (सर्व रा.चव्हाण वस्ती, थेऊर ता. हवेली जि. पुणे) अशी गुन्हा दाखल करण्यात आलेल्यांची नावे आहेत.
पोलिसांनी दिलेल्या माहितीनुसार, फिर्यादी आयनाबाई चव्हाण व आरोपी हे एकमेकांचे नातेवाईक आहेत. या दोन्ही कुटुंबामध्ये प्रेमविवाह झाल्यामुळे काही दिवसांपासून वादविवाद सुरु होते. याप्रकरणी फिर्यादी यांनी लोणी काळभोर पोलीस ठाण्यात तक्रार फिली आहे. परंतु, काही दिवसांनी त्या दोन्ही कुटुंबीयात आपापसात वाद मिटले होते. दरम्यान, शुक्रवारी (ता.21) सायंकाळी सात वाजण्याच्या सुमारास आशा चव्हाण फिर्यादी यांच्या कुटुंबाला जुन्या भांडणाचे कारणावरून शिवीगाळ करत होत्या. आयनाबाई चव्हाण यांनी थेऊर पोलीस चौकीत अदखलपात्र स्वरूपाचा गुन्हा नोंद केला होता.
शनिवारी (ता.22) सकाळी सात वाजण्याच्या सुमारास अरूण छबू चव्हाण, पुनम राजू धांदे व अर्जुन अरुण चव्हाण हे फिर्यादी आयनाबाई चव्हाण यांच्या घरी आले. त्यावेळी अरूण चव्हाण यांच्या हातामध्ये लोखंडी गज होता. तर अर्जुन चव्हाण यांच्या हातामध्ये लोखंडी हत्यार व पुनम धांदे यांच्य्ह्या हातामध्ये दगड होते. अरूण चव्हाण फिर्यादी यांना म्हणाला, म्हातारे तु काल झाल्यावर व बायको विरुध्द पोलीसात तक्रार का दिली, तुम्हाला आम्ही आता सोडणार नाही, असे म्हणून आरोपींनी आयनाबाई चव्हाण यांच्या कुटुंबाला मारहाण केली.
दिलीप चव्हाण यांना डाव्या हातावर लोखंडी गजाने मारहाण केली. भांडण सोडवण्यासाठी पुजा चव्हाण गेल्या असता त्यांना अर्जुन चव्हाण याने हातातील लोखंडी हत्याराने उजव्या व डाव्या हातावर, पायावर लोखंडी हत्याराने मारहाण केली. पुनम धांदे हिने दगडाने आयनाबाई चव्हाण, शेखर चव्हाण व उज्ज्वला सावंत यांना मारहाण केली. त्यानंतर सर्वांनी मिळून आयनाबाई चव्हाण यांच्या कुटुंबाला हाताने व लाथा-बुक्यांनी मारहाण करून शिवीगाळ केली. व जिवे ठार मारण्याची धमकी देवुन तिघे तिथून निघून गेले.
या मारहाणीत आयनाबाई चव्हाण, शेखर चव्हाण, उज्ज्वला सांवत यांना गंभीर दुखापत झाली आहे. तर दिलीप चव्हाण व पुजा चव्हाण किरकोळ जखमी झाले आहेत. याप्रकरणी आयनाबाई दिलीप चव्हाण (वय 55, रा.चव्हाण वस्ती, थेऊर ता. हवेली जि.पुणे) यांनी लोणी काळभोर पोलीस ठाण्यात फिर्याद दिली आहे. त्यानुसार आरोपींच्या विरोधात भारतीय न्याय संहिता 118(2), 115 (2), 351(2)(3) 3(5), भारतीय हत्यार कायदा कलम 4(25) सह महाराष्ट्र पोलीस कायदा कलम 37(1) (2) (3) सह 135 प्रमाणे गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक दिगंबर सोनटक्के करत आहेत.
