Ahilyanagar : अहिल्यानगर, ता. 16 : अहिल्यानगर जिल्ह्यातील जामखेड तालुक्यातील फक्राबाद येथे अन्न-औषध प्रशासनाने केलेल्या कारवाईत दूध भेसळीचा प्रकार समोर आला आहे. संशयावरून तपास करताना अधिकाऱ्यांनी सहा ड्रममधील सुमारे 350 लिटर दूध ताब्यात घेतले.
मिळालेल्या माहितीनुसार, संबंधित व्यक्तीच्या शेतवस्तीवरील घरातून मागील काही महिन्यांपासून भेसळयुक्त दूध तयार करून विक्री केली जात असल्याचा संशय होता. कारवाईदरम्यान 200 लिटर दुधात सुमारे 150 लिटर लिक्विड केमिकल मिसळले जात असल्याचे आढळून आले, अशी माहिती अन्न-औषध प्रशासन विभागातील अधिकाऱ्यांनी दिली.
छापेमारीवेळी एका वाहनात 200 लिटर क्षमतेचे दहा प्लास्टिक ड्रम सापडले. त्यापैकी चार ड्रम रिकामे होते, तर उर्वरित ड्रममध्ये संशयित दूध आढळले. अन्न-औषध प्रशासन आणि स्थानिक गुन्हे शाखेच्या संयुक्त पथकाने संबंधित आरोपीला ताब्यात घेतले असून पुढील तपास सुरू आहे.
दरम्यान, कारवाईदरम्यान केमिकल मिसळण्याची पद्धत दाखविण्यात आल्याचा व्हिडिओ सोशल मीडियावर व्हायरल होत असून, या प्रकरणाची जिल्ह्यात जोरदार चर्चा सुरू आहे. अधिक तपासानंतर दोषींवर कायदेशीर कारवाई केली जाणार असल्याचे प्रशासनाकडून स्पष्ट करण्यात आले आहे.
