नागपूर : मराठा आरक्षणासाठी आंदोलन करीत असलेले मनोज जरांगे पाटील यांच्याबाबत वक्तव्य केल्यामुळे विधानसभेचे विरोधी पक्षनेते विजय वडेट्टीवार (Vijay Wadettiwar) यांना धमक्यांचे फोन आणि मेसेज आल्याची माहिती समोर आली आहे. ही गंभीर बाब विजय वडेट्टीवार यांनी गृहमंत्री फडणवीस आणि मुख्यमंत्री शिंदे यांना कळवली असून सुरक्षा वाढविण्याची मागणी केली आहे.
ओबीसीतून मराठा समाजाला आरक्षण द्यावे, अशी मागणी मनोज जरांगे पाटील करीत आहे. या मागणीला ओबीसी नेते म्हणून विजय वडेट्टीवार यांनी विरोध केला होता. मनोज जरांगे पाटील हे मराठा समाजाची दिशाभुल करत असल्याची टीका देखील वडेट्टीवार यांनी केली होती. मराठा समाजाला स्वतंत्र आरक्षण द्यावे, ओबीसीतून नको, अशी भूमिका विरोधी पक्षनेते वडेट्टीवार यांनी घेतली आहे. या पार्श्वभूमीवर जरांगे पाटील यांच्याबाबत बोलल्यानंतर वडेट्टीवार यांना मोबाईलवर धमक्या मिळत आहेत.
सध्याच्या घडीला विरोधी पक्षनेते विजय वडेट्टीवार यांना वाय प्लस सुरक्षा आहे. तीन जवान व एक गाडी त्यांच्या सुरक्षेत तैनात असते. मात्र, आता मोबाईलवर येणाऱ्या धमक्या पाहता आपल्या सुरक्षेत आणखी वाढ करावी, अशी मागणी विजय वडेट्टीवार यांनी मुख्यमंत्री व गृहमंत्री यांच्याकडे केली आहे.
