Crime News: नागपूर : नागपूर शहरातील लकडगंज पोलीस ठाण्याच्या हद्दीत एक धक्कादायक आणि गंभीर प्रकार उघडकीस आला आहे. कायद्याचे रक्षण करणाऱ्या एका महिला पोलीस (Women Police) कर्मचाऱ्यावरच लैंगिक अत्याचार (Sexual assault) करून तिची फसवणूक आणि ब्लॅकमेल (Blackmail) केल्याचा प्रकार समोर आला आहे. या घटनेनंतर महाराष्ट्रात एकच खळबळ उडाली आहे. Nagpur Crime
आरोपीने पीडित महिला पोलिसाचे आक्षेपार्ह फोटो आणि व्हिडिओ तयार करून ते व्हायरल करण्याची धमकी देत तिच्याकडून 15 लाख 60 हजार रुपये उकळल्याचा आरोप आहे. या प्रकरणी 25 वर्षीय महिला पोलीस अंमलदाराने लकडगंज पोलीस ठाण्यात फिर्याद दाखल केली असून पोलिसांनी गुन्हा नोंदवला आहे.
पोलिस तपासानुसार आरोपीचे नाव विकिन सूर्यभान फुलारे वय 30 असून तो छत्रपती संभाजीनगर जिल्ह्यातील रहिवासी आहे. आरोपी आधीच विवाहित असतानाही त्याने एका नामांकित विवाह नोंदणी संकेतस्थळावर खोटी माहिती भरली होती. त्याने स्वतःला अविवाहित आणि व्यवसायाने वकील असल्याचे भासवले. या खोट्या ओळखीच्या आधारे त्याने संबंधित महिला पोलिसाशी संपर्क साधला.
सुरुवातीला चॅटिंग आणि नंतर व्हिडिओ कॉलच्या माध्यमातून आरोपीने महिलेचा विश्वास संपादन केला. ओळख वाढल्यानंतर त्याने तिच्यावर लैंगिक अत्याचार केल्याचा आरोप आहे. त्यानंतर त्याने तिचे आक्षेपार्ह फोटो आणि व्हिडिओ तयार करून त्याच्या आधारे तिला ब्लॅकमेल करण्यास सुरुवात केली. बदनामीच्या भीतीने पीडित महिला मानसिक तणावाखाली होती.
याच परिस्थितीचा फायदा घेत आरोपीने फर्निचर खरेदी, घरगुती अडचणी आणि इतर वैयक्तिक कारणे सांगत वेळोवेळी महिलेकडून 15 लाख 60 हजार रुपये घेतले. पुढे जेव्हा पीडितेने लग्नाबाबत विचारणा केली, तेव्हा आरोपीने तिला जिवे मारण्याची धमकी दिली. किन्नरांकडून हत्या करून घेण्याची तसेच समाजात बदनामी करण्याची धमकी दिल्याचा आरोपही फिर्यादीत नमूद करण्यात आला आहे.
या प्रकरणाचा तपास लकडगंज पोलीस करत असून आरोपीचा शोध सुरू आहे. या घटनेमुळे नागपूर शहरात खळबळ उडाली असून मॅट्रिमोनियल संकेतस्थळांवरील फसवणुकीचा गंभीर प्रश्न पुन्हा एकदा समोर आला आहे.
