Crime News: अकोला : अकोला शहरात मन हेलावून टाकणारी एक गंभीर घटना समोर आली आहे. अकोट फैल पोलीस स्टेशन हद्दीत राहणाऱ्या आठ वर्षांच्या मुलीवर आईच्या ओळखीतील व्यक्तीने लैंगिक अत्याचार केल्याचा आरोप करण्यात आला आहे. या प्रकरणामुळे संपूर्ण परिसरात खळबळ उडाली असून नागरिकांमध्ये तीव्र संताप व्यक्त होत आहे.
मिळालेल्या माहितीनुसार, पीडित मुलीचे वडील मजुरी करून कुटुंबाचा उदरनिर्वाह करतात. कौटुंबिक वादामुळे पती-पत्नी गेल्या वर्षापासून वेगळे राहत आहेत. तीनही मुली आईसोबत नायगाव परिसरात राहत होत्या. आईचे सोहेल खान नावाच्या व्यक्तीसोबत ओळखीचे संबंध असल्याचे वडिलांनी तक्रारीत नमूद केले आहे.
16 फेब्रुवारी रोजी सकाळी वडिलांना त्यांच्या दुसऱ्या मुलीकडून फोन आला. आरोपीने मारहाण केल्याचे तिने सांगितले. ही माहिती मिळताच वडील तातडीने मुलींकडे गेले. त्यावेळी मोठ्या मुलीने धक्कादायक बाब सांगितली. आई घरी नसताना आरोपी रात्री घरी येत असे आणि तिच्यावर वारंवार अत्याचार करत असे, असे तिने सांगितले. विरोध केल्यास मारहाण केली जात असल्याचेही मुलीने सांगितले. याबाबत तिने यापूर्वी आईला माहिती दिली होती, असेही वडिलांना कळवण्यात आले.
मुलीच्या जबाबानंतर वडिलांनी तात्काळ अकोट फैल पोलीस स्टेशनमध्ये तक्रार दाखल केली. पोलिसांनी प्रकरणाची गंभीर दखल घेत आरोपी सोहेल खान याच्यावर गुन्हा दाखल करून त्याला अटक केली आहे. सध्या आरोपी पोलीस कोठडीत असून पुढील तपास सुरू आहे.
