Buldhana News: बुलढाणा : मोताळा शहरात एका 17 वर्षीय अल्पवयीन मुलीचा मृतदेह आढळून आल्याने परिसरात मोठी खळबळ उडाली आहे. गिट्टी खदान परिसरातील नदीच्या पात्रात न्यायालयाच्या इमारतीच्या मागील बाजूस हा मृतदेह (Deathbody) सापडला. शुक्रवारी पहाटे स्थानिक नागरिकांना नदीत मृतदेह तरंगताना दिसला. त्यांनी तात्काळ पोलिसांना माहिती दिल्यानंतर पोलीस घटनास्थळी दाखल झाले.
मृत तरुणी काल सायंकाळपासून बेपत्ता होती. ती घरी परतली नसल्याने कुटुंबीयांनी तिचा शोध सुरू केला होता. मात्र तिचा काहीच पत्ता लागला नव्हता. आज सकाळी तिचा मृतदेह सापडल्याने कुटुंबीयांना मोठा धक्का बसला आहे. मृतदेहाची अवस्था संशयास्पद असल्याने तिच्यावर अत्याचार करून हत्या करण्यात आल्याची शक्यता व्यक्त केली जात आहे.
घटनेची माहिती मिळताच पोलीस आणि वैद्यकीय पथक घटनास्थळी दाखल झाले. पोलिसांनी परिसराची पाहणी करून मृतदेह ताब्यात घेतला आणि पंचनामा केला. तसेच अधिक तपासासाठी तज्ज्ञ पथकाने घटनास्थळावरून आवश्यक नमुने गोळा केले आहेत. मृतदेह शवविच्छेदनासाठी शासकीय रुग्णालयात पाठवण्यात आला असून अहवालानंतर मृत्यूचे नेमके कारण स्पष्ट होणार आहे.
या घटनेनंतर मोताळा परिसरात संतापाचे वातावरण निर्माण झाले आहे. नागरिकांनी आरोपींना तात्काळ अटक करून कठोर कारवाई करण्याची मागणी केली आहे. कोणताही अनुचित प्रकार घडू नये यासाठी पोलिसांनी परिसरात बंदोबस्त वाढवला आहे.
दरम्यान, पोलिसांकडून या प्रकरणाचा सर्व बाजूंनी तपास सुरू आहे. परिसरातील सीसीटीव्ही चित्रफिती, तसेच इतर माहितीच्या आधारे संशयितांचा शोध घेतला जात आहे. या घटनेमुळे संपूर्ण परिसरात भीती आणि हळहळ व्यक्त केली जात आहे.
