Bhokardan Crime: भोकरदन तालुक्यातील अवघडराव सावंगी येथील एक धक्कादायक प्रकरण समोर आले आहे. एका मुलाने आणि त्याच्या पत्नीने शेतीच्या एक एकर शेतजमिनीच्या मालकीसाठी आपल्याच जन्मदात्या पित्यालाच मारहाण केली.
विठ्ठल कुंडलिक गावंडे या ६० वर्षीय वृद्ध पित्याला मुलगा सागर गावंडे आणि सुना पूजा गावंडे यांनी मारहाण करून घरातून हाकलून दिलं. तसेच त्यांना जीवे मारण्याची धमकी देऊन शेतजमिनीच्या मालकीसाठी दबाव आणला.
पोलिसांनी दिलेल्या माहितीनुसार, विठ्ठल गावंडे यांच्याकडे अडीच एकर शेतजमीन होती. त्यापैकी दीड एकर जमीन मुलाच्या आणि सुनेच्या नावावर आधीच केली होती. मात्र, शिल्लक असलेल्या एक एकर शेतजमिनीसाठी मुलगा आणि सुनेने त्यांना तगादा लावला. पित्याने ते स्वीकारले नाही आणि त्यांना नकार दिला.
त्यानंतर मुलगा आणि सुनेने त्यांच्यावर लाथा बुक्यांनी मारहाण केली, शिवीगाळ केली आणि जीवे मारण्याची धमकी दिली. घरातून हाकलून दिल्यामुळे विठ्ठल गावंडे गेल्या दोन महिन्यांपासून घराबाहेर राहून आपल्या उदरनिर्वाहासाठी काम करत आहेत.
या प्रकरणी पोलिसांनी सागर गावंडे आणि पूजा गावंडे यांच्याविरुद्ध गुन्हा नोंदविला आहे. सहायक पोलिस निरीक्षक संतोष माने आणि जमादार प्रकाश सिनकर यांनी या प्रकरणाचा तपास सुरू केला आहे.
