नाशिक: नाशिकमधील स्वयंघोषित ‘भोंदू बाबा’ अशोक खरात याच्या अटकेनंतर (Ashok Kharat Case) पोलिस तपासात त्याच्या आयुष्याचा एक धक्कादायक चेहरा समोर आला आहे. स्वतःला दैवी शक्तीचा दावा करणाऱ्या या व्यक्तीने नाव, शिक्षण, व्यवसाय अशा अनेक बाबतीत खोटेपणा करत वर्षानुवर्षे लोकांची फसवणूक केल्याचे उघड झाले आहे. (Latest Marathi News)
पोलिसांनी दिलेल्या माहितीनुसार, अशोक खरात याचे मूळ नाव लक्ष्मण एकनाथ खरात असून तो नाशिक जिल्ह्यातील सिन्नर तालुक्यातील कहांडळवाडी येथील रहिवासी आहे. शाळेच्या दाखल्याप्रमाणे त्याचा जन्म 1 जून 1965 रोजी झाला असून तो दहावी नापास आहे. लहानपणापासूनच त्याचा स्वभाव चंचल आणि संशयास्पद असल्याच्या तक्रारी होत्या. गावातील शेतकऱ्यांच्या कोंबड्या आणि अंडी चोरण्याच्या घटनांमध्ये त्याचे नाव समोर आले होते. 1983-84 च्या सुमारास कोंबडी चोरीच्या प्रकरणात तो रंगेहात पकडला गेल्यानंतर काही काळ तो गायब झाला.
यानंतर 1994-95 दरम्यान तो पुन्हा गावी परतला, मात्र यावेळी त्याने स्वतःला नौदलातील कॅप्टन असल्याचे सांगत नवे व्यक्तिमत्त्व उभे केले. सिन्नरमध्ये एका खासगी अकॅडमीत नोकरी करत असताना त्याने ज्योतिष आणि तंत्रविद्येचा दावा करत लोकांमध्ये संपर्क वाढवला. पुढे नाशिकमध्ये स्थायिक होत त्याने जमीन खरेदी-विक्रीचा व्यवसाय सुरू केला आणि त्याचबरोबर धार्मिक विधी, तंत्र-मंत्र आणि ‘उपचार’ यांच्या नावाखाली आपला प्रभाव वाढवला.
2008-09 च्या सुमारास मिरगाव येथे ईशान्येश्वर मंदिर उभारून आणि 13 ऑगस्ट 2009 रोजी शिवनिका ट्रस्ट स्थापन करून त्याने स्वतःची प्रतिमा अधिक बळकट केली. देश-विदेशात 154 देशांची भ्रमंती केल्याचा दावा करत अनेक राजकीय नेते आणि प्रभावशाली व्यक्तींशी संबंध असल्याचेही तो सांगत असे.
या प्रकरणाला निर्णायक वळण 18 फेब्रुवारी 2026 रोजी मिळाले, जेव्हा त्याच्या सहकाऱ्याविरोधात ब्लॅकमेलिंगची तक्रार शिर्डी पोलिसांत दाखल झाली. त्यानंतर सुरू झालेल्या तपासातून 17 मार्च 2026 रोजी अशोक खरातला महिलांच्या लैंगिक शोषणाच्या आरोपांवरून अटक करण्यात आली. सध्या तो पोलिस कोठडीत असून राज्य सरकारने एसआयटीमार्फत सखोल तपास सुरू केला आहे.
या संपूर्ण प्रकरणामुळे अंधश्रद्धा, भीती आणि खोट्या दाव्यांच्या आधारे उभारलेल्या ‘आध्यात्मिक’ साम्राज्यांचे वास्तव समोर आले आहे. एसआयटीने सुरू केलेल्या हेल्पलाईनवर अनेक पीडितांकडून तक्रारी येत असून, येत्या काळात आणखी धक्कादायक खुलासे होण्याची शक्यता व्यक्त केली जात आहे.
