Pune Viral Video : पुणे : नाशिकमधील भोंदू बाबा अशोक खरात याचे अश्लील कृत्य उघडकीस आल्यानंतर संपूर्ण महाराष्ट्रात संतापाची लाट आहे. या प्रकरणाचे पडसाद आता पुणे जिल्ह्यातील खेड तालुक्यात उमटल्याचे पाहायला मिळत आहे. धर्माच्या नावाखाली सर्वसामान्यांची फसवणूक करणाऱ्या दोन भोंदू बाबांना एका वृद्ध आजोबांनी भररस्त्यात चांगलाच धडा शिकवला आहे. आजोबांनी या भोंदू महाराजांना काठीने चोप दिल्याची घटना समोर आली असून, या घटनेचा व्हिडिओ सोशल मीडियावर मोठ्या प्रमाणावर व्हायरल झाला आहे.
मिळालेल्या माहितीनुसार, ही घटना खेड तालुक्यातील पाईट-सावंतवाडी परिसरात घडली आहे. येथे काही फिरस्ते बाबा फिरत असताना त्यांनी एका महिलेला आपल्या जाळ्यात ओढले. घरातील बाधा दूर करणे किंवा भविष्य सांगण्याच्या बहाण्याने या भोंदू बाबांनी त्या महिलेकडून 5000 रुपयांची मागणी केली आणि तिची आर्थिक फसवणूक केली. मात्र, नाशिकच्या खरात प्रकरणामुळे लोक आधीच सावध झाले होते. हा फसवणुकीचा प्रकार स्थानिक आजोबांच्या लक्षात आला आणि त्यांनी या बाबांना रस्त्यात गाठले.
व्हायरल व्हिडिओमध्ये दिसत आहे की, संतापलेले आजोबा या दोन्ही भोंदू बाबांना हाताने आणि काठीने मारहाण करत आहेत. यावेळी दोन्ही भोंदू बाबा आपली चूक मान्य करून सोडून देण्याची विनंती करत होते, परंतु आजोबांनी त्यांना चांगलाच चोप दिला. या घटनेमुळे परिसरात एकच खळबळ उडाली आहे. फसवणूक करणाऱ्या अशा भोंदू लोकांपासून नागरिकांनी सावध राहावे, असे आवाहन आता स्थानिक ग्रामस्थांकडून केले जात आहे. कोणत्याही चमत्काराच्या दाव्यावर किंवा अनोळखी बाबांवर विश्वास ठेवू नका, असेही यात सांगण्यात आले आहे.
