Nashik News: नाशिक: नाशिकमधील (Nashik ) एका आलिशान रिसॉर्टमध्ये सुरू असलेला लग्नसोहळा क्षणात शोकांतिकेत बदलला. ज्या ठिकाणी लग्नाची तयारी, पाहुण्यांची गर्दी आणि आनंदाचे वातावरण होते, त्याच ठिकाणी हळदीच्या दिवशी 29 वर्षीय वधूचा अचानक (Bride death at resort) मृत्यू झाला. या घटनेमुळे संपूर्ण कुटुंबासह वऱ्हाडी मंडळींवर दुःखाचा डोंगर कोसळला आहे.
मृत वधूचे नाव दीपशीखा गिरीश गोडबोले असे आहे. त्या मुंबईतील दादर-माटुंगा परिसरात रुपारेल कॉलेजजवळ वास्तव्यास होत्या. दीपशीखा यांचा विवाह नाशिकजवळील गंगापूर परिसरातील एका रिसॉर्टमध्ये ठरला होता. यासाठी गोडबोले कुटुंबीय आणि नातेवाईक काही दिवसांपूर्वीच नाशिकमध्ये दाखल झाले होते. शनिवारी रात्री संगीत सोहळा उत्साहात पार पडला होता. दीपशीखा यांच्या हातावर मेहंदीही काढण्यात आली होती आणि रविवारी सकाळी लग्नाचे विधी पार पडणार होते.
रविवारी सकाळी साडेनऊ वाजताच्या सुमारास रिसॉर्टमधील खोली क्रमांक 201 मध्ये नातेवाईकांसोबत असताना दीपशीखा यांना अचानक चक्कर आली आणि त्या खाली कोसळल्या. उपस्थित नातेवाईकांनी तात्काळ मदतीसाठी धाव घेतली. त्यांच्या आत्या डॉ. स्वाती बापट यांनी प्राथमिक उपचार करून त्यांना त्वरित श्रीगुरुजी रुग्णालयात दाखल केले. मात्र प्रकृती गंभीर असल्याने त्यांना जिल्हा रुग्णालयात हलवण्यात आले. तेथे डॉक्टरांनी त्यांना मृत घोषित केले.
मिळालेल्या माहितीनुसार, लग्नाच्या तयारीदरम्यान दीपशीखा यांना थोडी अस्वस्थता जाणवत होती. मात्र आदल्या रात्रीचे जागरण, लग्नाची धावपळ आणि दगदग यामुळे असेल, असा अंदाज बांधून त्याकडे दुर्लक्ष करण्यात आले. दुर्दैवाने हीच अस्वस्थता त्यांच्या जीवावर बेतली.
या प्रकरणी सरकारवाडा पोलिसांनी अकस्मात मृत्यूची नोंद केली आहे. विशेष म्हणजे याच रिसॉर्टमध्ये अवघ्या आठवडाभरापूर्वी एका वधूपित्याचा हृदयविकाराच्या झटक्याने मृत्यू झाला होता. त्यामुळे पुन्हा एकदा याच ठिकाणी घडलेल्या घटनेमुळे परिसरात खळबळ उडाली असून नागरिकांमध्ये विविध चर्चा सुरू आहेत.
