Malegaon Municipal Corporation election: मालेगाव : नाशिक जिल्ह्यातील मालेगावमध्ये महानगरपालिका निवडणुकीच्या (Municipal Corporation election) मतदानाला अवघे काही तास शिल्लक असताना एक खळबळजनक घटना घडली आहे. मतदानाच्या अवघ्या काही तास आधी एमआयएमच्या (MIM) उमेदवारावर हल्ला झाल्याने शहरातील राजकीय वातावरण तापले असून निवडणूक प्रक्रियेच्या सुरक्षिततेबाबत चिंता व्यक्त केली जात आहे.
मालेगाव शहरातील प्रभाग क्रमांक 4 मधून एमआयएमकडून निवडणूक लढवणारे उमेदवार विशाल आहिरे यांच्यावर रात्री उशिरा अज्ञात व्यक्तींनी हल्ला केला. या घटनेनंतर परिसरात एकच खळबळ उडाली आहे. या हल्ल्यात त्यांच्या वाहनाच्या काचा फोडण्यात आल्या. सुदैवाने या घटनेत विशाल आहिरे यांना कोणतीही इजा झाली नाही. मात्र या प्रकारामुळे शहरात भीतीचे वातावरण निर्माण झाले आहे.
मिळालेल्या माहितीनुसार, विशाल आहिरे हे आपल्या पोलिंग एजंट्सची बैठक आटोपून घरी परतत होते. त्याच वेळी मुंबई–आग्रा महामार्गावर दुचाकीवरून आलेल्या अज्ञात व्यक्तींनी त्यांच्या वाहनाला अडवण्याचा प्रयत्न केला. काही क्षणातच हल्लेखोरांनी दगडफेक करत वाहनाच्या काचा फोडल्या. हल्लेखोरांनी थेट उमेदवारावर हल्ला करण्याचा प्रयत्न केल्याचा आरोप करण्यात येत आहे.
या अचानक घडलेल्या प्रकारामुळे परिस्थिती गंभीर बनली होती. मात्र प्रसंगावधान राखत विशाल आहिरे यांनी आपले वाहन वेगाने सायनेगावच्या दिशेने वळवले आणि घटनास्थळावरून निघून गेले. त्यामुळे पुढील अनर्थ टळला आणि त्यांचा जीव वाचला. घटनेची माहिती मिळताच पोलिसांनी तत्काळ घटनास्थळी धाव घेतली असून परिसरात तपास सुरू करण्यात आला आहे.
घटनेची माहिती मिळताच पोलिसांनी तात्काळ धाव घेऊन परिस्थिती नियंत्रणात आणली. शहरात कोणत्याही प्रकारचा अनुचित प्रकार घडू नये यासाठी राज्य राखीव पोलीस दलाच्या तुकड्या तैनात करण्यात आल्या आहेत. या प्रकरणी अज्ञात हल्लेखोरांविरुद्ध गुन्हा दाखल करण्याची प्रक्रिया सुरू असून, सीसीटीव्ही फुटेजच्या मदतीने पोलिसांकडून तपास केला जात आहे.
मतदानाला अवघ्ये काही तास उरले असताना कोणताही अडथळा येऊ नये, यासाठी प्रशासनाने नागरिकांना शांतता राखण्याचे आवाहन केले आहे.
