नाशिक: भोंदू अशोक खरात प्रकरणात आता मोठी कारवाई करण्यात (Ashok Kharat) आली असून त्याची पत्नी कल्पना खरात हिच्याविरोधात लुकआऊट नोटीस जारी करण्यात आली आहे. शिर्डी पोलिसांनी ही कारवाई करत तिच्या परदेशात पळून जाण्याचे सर्व मार्ग बंद केले आहेत. (Kalpana Kharat)
शिर्डी परिसरात शेतकऱ्याची फसवणूक आणि सावकारकी प्रकरणात अशोक खरात आणि कल्पना खरात यांच्याविरोधात गुन्हा दाखल आहे. या प्रकरणात गुन्हा नोंद झाल्यानंतर कल्पना खरात फरार झाली असून, तिचा शोध घेण्यासाठी पोलिसांनी विशेष पथके तैनात केली आहेत.
तपासादरम्यान आरोपी परदेशात पळून जाण्याची शक्यता व्यक्त करण्यात आली होती. त्यानुसार शिर्डी पोलिसांनी तातडीने लुकआऊट नोटीस जारी केली. यामुळे विमानतळ, बंदरे आणि इमिग्रेशन तपासणी केंद्रांवर अलर्ट जारी करण्यात आला असून, देशाबाहेर जाण्याचा मार्ग पूर्णपणे बंद करण्यात आला आहे.
दरम्यान, या प्रकरणात आधीच काही आरोपींना ताब्यात घेण्यात आले असून, आर्थिक व्यवहारांची सखोल चौकशी सुरू आहे. भोंदूगिरीच्या आडून कोट्यवधींची फसवणूक केल्याचा संशय असून, तपासात आणखी धक्कादायक खुलासे होण्याची शक्यता वर्तवली जात आहे.
कल्पना खरात फरार असली तरी पोलिसांनी तिच्या हालचालींवर बारीक लक्ष ठेवले असून, लवकरच तिला अटक करण्यात येईल असा विश्वास व्यक्त केला जात आहे.
