अहिल्यानगर: अहिल्यानगर (Ahilyanagar Crime) जिल्ह्यातील राहुरी तालुक्यात एक अत्यंत संतापजनक आणि माणुसकीला काळीमा फासणारी घटना उघडकीस आली आहे. नातेवाईकानेच एकाच कुटुंबातील चार बहिणींचे लैंगिक शोषण केल्याचे समोर आले आहे. या प्रकरणी पोलिसांनी आरोपी व्यक्तीसह त्याच्या पत्नीलाही अटक केली आहे.
मिळालेल्या माहितीनुसार, आई-वडील विभक्त झाल्यामुळे या चार बहिणींचा सांभाळ करण्याची जबाबदारी दूरच्या नातेवाईकाकडे सोपवण्यात आली होती. मात्र, मुलींचे रक्षण करण्याऐवजी नराधम तरुणींवर अनेक दिवसांपासून लैंगिक अत्याचार करत होता. पीडित मुलींपैकी एक मुलगी सज्ञान असून, उर्वरित तीन मुली 16, 14 आणि 10 वर्षांच्या अल्पवयीन आहेत.
या गंभीर प्रकरणाचा पर्दाफाश स्नेहालय संस्थेच्या ‘उडान’ प्रकल्पाच्या कार्यकर्त्यांनी केला. चार महिन्यांपूर्वी लग्न झालेली सर्वात मोठी मुलगी आपल्या बहिणींना भेटण्यासाठी आल्यावर, आरोपीने पुन्हा तिच्यावर अत्याचार केला. यानंतर पीडितेने घडलेला प्रकार आपल्या पतीला सांगितला. दोघांनीही तातडीने स्नेहालय संस्थेशी संपर्क साधला आणि मदत मागितली.
संस्थेच्या कार्यकर्त्यांनी तात्काळ राहुरी पोलिसांना या घटनेची माहिती दिली. पोलिसांनी वेगाने पावले उचलत चारही पीडित मुलींची सुटका केली आणि आरोपी दांपत्याला बेड्या ठोकल्या. पोलिस निरीक्षक संजय ठेंगे यांनी या कारवाईची माहिती दिली आहे. पोलिसांच्या तपासणीत आरोपीने केवळ सज्ञान मुलीवरच नव्हे, तर तिच्या तीन अल्पवयीन बहिणींवरही अनेकदा अत्याचार केल्याचे स्पष्ट झाले आहे.
या गंभीर गुन्ह्याला जबाबदार असलेल्या आरोपींना कठोर शिक्षा मिळावी, अशी मागणी सामाजिक आणि राजकीय वर्तुळातून जोर धरत आहे. पोलिसांनी आरोपी दांपत्याला अटक केली असून, आरोपींना आज न्यायालयासमोर हजर केले जाणार आहे.
