छत्रपती संभाजीनगर: छत्रपती संभाजीनगर शहरात (Viral News) एका साडीच्या ऑफरमुळे मोठा गोंधळ (Chhatrapati Sambhajinagar) उडाल्याची घटना समोर आली आहे. सोशल मीडियावर 5000 रुपयांची साडी फक्त 599 रुपयांना मिळत असल्याची रील व्हायरल झाल्यानंतर संबंधित दुकानाबाहेर महिलांची प्रचंड गर्दी उसळली. स्वस्त दरात महागडी साडी मिळणार या अपेक्षेने सकाळपासूनच महिलांनी दुकानाकडे धाव घेतली. (Latest Mrathi News)
ही घटना छत्रपती संभाजीनगर शहरातील एका प्रसिद्ध कापड दुकानात घडली. ऑफर मर्यादित वेळेसाठी असल्याचे सांगण्यात आल्याने महिलांमध्ये अधिकच उत्सुकता निर्माण झाली. दुकान उघडताच आत प्रवेश मिळवण्यासाठी एकच गर्दी झाली. गर्दी इतकी वाढली की काही वेळातच गोंधळाची परिस्थिती निर्माण झाली.
या गोंधळात तीन महिला बेशुद्ध पडल्याची माहिती समोर आली आहे. गर्दी, उकाडा आणि चेंगराचेंगरीसदृश परिस्थितीमुळे महिलांना त्रास झाल्याचे सांगण्यात येत आहे. घटनास्थळी उपस्थित लोकांनी तत्काळ बेशुद्ध पडलेल्या महिलांना बाजूला काढत पाणी पाजले. त्यानंतर त्यांना प्राथमिक उपचार देण्यात आले.
घटनेची माहिती मिळताच पोलिसांनी तातडीने घटनास्थळी धाव घेतली. पोलिसांनी गर्दी नियंत्रणात आणत परिस्थिती हाताळली. मोठा अनर्थ होण्याआधीच पोलिसांच्या हस्तक्षेपामुळे परिस्थिती आटोक्यात आली. काही काळासाठी दुकान बंद करण्याच्या सूचनाही देण्यात आल्या.
दरम्यान, सोशल मीडियावर व्हायरल होणाऱ्या अशा ऑफर्सबाबत नागरिकांनी सतर्क राहावे, असे आवाहन पोलिसांकडून करण्यात आले आहे. आकर्षक जाहिराती आणि सवलतीच्या नावाखाली होणाऱ्या गर्दीमुळे जीविताला धोका निर्माण होऊ शकतो, त्यामुळे अशा ठिकाणी सुरक्षिततेचे नियम पाळावेत, असेही पोलिसांनी स्पष्ट केले आहे.
