छत्रपती संभाजीनगर: छत्रपती संभाजीनगर जिल्ह्यातील गंगापूर-लासूर (Chhatrapati Sambhajinagar) मार्गावर घडलेल्या अमानुष हल्ल्याने परिसरात तीव्र संताप आणि भीतीचे वातावरण निर्माण झाले आहे. शिंदेवाडी फाटा परिसरात एका 32 वर्षीय तरुणावर अत्यंत क्रूर पद्धतीने हल्ला करण्यात आला, ज्यात हल्लेखोरांनी त्याच्या गुप्तांगावर धारदार शस्त्राने वार करत त्याला गंभीर जखमी केले. (Latest Marathi News)
मिळालेल्या माहितीनुसार, शनिवारी सायंकाळी साडेसातच्या सुमारास हा तरुण रस्त्यावरून जात असताना दबा धरून बसलेल्या अज्ञात आरोपींनी त्याला अडवले. त्यानंतर जबरदस्तीने त्याला रस्त्यालगतच्या एका निर्जन शेतात नेण्यात आले. तिथे त्याच्यावर निर्दयी मारहाण करण्यात आली आणि विशेषतः त्याच्या गुप्तांगावर लक्ष केंद्रीत करत धारदार हत्याराने वार करण्यात आले. या हल्ल्याची क्रूरता इतकी भीषण होती की, आरोपींनी त्याला अक्षरशः मृत्यूच्या उंबरठ्यावर नेऊन ठेवले.
हल्ला केल्यानंतर आरोपी थांबले नाहीत. त्यांनी गंभीर जखमी अवस्थेतील त्या तरुणाला पुन्हा रस्त्यावर आणून टाकले आणि अंधाराचा फायदा घेत घटनास्थळावरून पसार झाले. मदतीसाठी विव्हळत तो बराच वेळ रस्त्यावर पडून होता. अखेर नातेवाईकांना माहिती मिळाल्यानंतर त्याला तत्काळ गंगापूर उपजिल्हा रुग्णालयात दाखल करण्यात आले.
या प्रकारामुळे गुन्हेगारांच्या निर्दयतेचा आणि कायदा-सुव्यवस्थेच्या प्रश्नांचा गंभीर मुद्दा पुन्हा समोर आला आहे. पोलिसांकडून हल्ल्यामागील नेमके कारण शोधण्याचे काम सुरू असून, आरोपींचा शोध घेतला जात आहे. ग्रामस्थांकडून या घटनेतील दोषींवर कठोर कारवाई करण्याची जोरदार मागणी केली जात आहे.
