Suicide News : बीड : बीड जिल्ह्यातील मांजरसुंबा परिसरात एक धक्कादायक घटना समोर आली आहे. प्रेमसंबंधातून निर्माण झालेल्या वादामुळे 23 वर्षीय तरुणाने गळफास (Suicide) घेऊन आत्महत्या केल्याची माहिती मिळाली आहे. ज्ञानेश्वर तुकाराम कोकाटे असे मृत तरुणाचे नाव असून, या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, ज्ञानेश्वर याचे नेकनूरजवळील एका गावातील तरुणीसोबत प्रेमसंबंध होते. या संबंधाची माहिती मुलीच्या नातेवाईकांना मिळाल्यानंतर त्यांनी संताप व्यक्त केला. काही दिवसांपूर्वी त्यांनी ज्ञानेश्वरला अडवून त्याच्याकडे जाब विचारला. यावेळी त्याच्यावर मारहाण करण्यात आली. तसेच त्याच्यावर चोरीचा आरोप देखील करण्यात आल्याचे समोर आले आहे.
भररस्त्यात झालेल्या या प्रकारामुळे ज्ञानेश्वर मानसिक तणावाखाली गेला होता. मारहाण आणि खोट्या आरोपांमुळे त्याची बदनामी झाली होती. या सगळ्या परिस्थितीचा त्याच्यावर मोठा परिणाम झाला. त्यातूनच त्याने राहत्या घरी गळफास घेऊन आपले जीवन संपवले, अशी प्राथमिक माहिती समोर येत आहे.
या घटनेनंतर ज्ञानेश्वरच्या कुटुंबीयांनी नेकनूर पोलीस ठाण्यात तक्रार दाखल केली आहे. तक्रारीनुसार काही जणांवर आत्महत्येस प्रवृत्त केल्याचा गुन्हा नोंदवण्यात आला आहे. पोलिसांनी या प्रकरणाची गंभीर दखल घेतली असून पुढील तपास सुरू केला आहे.
या घटनेमुळे प्रेमसंबंधांमधील वाद किती गंभीर वळण घेऊ शकतो, हे पुन्हा एकदा समोर आले आहे. तरुणाच्या मृत्यूमुळे गावात शोककळा पसरली असून नागरिकांनी या प्रकरणात कठोर कारवाईची मागणी केली आहे.
