छत्रपती संभाजीनगर: छत्रपती संभाजीनगरच्या (Shocking News) वाळूज परिसरात माणुसकीला काळिमा फासणारी एक अत्यंत संतापजनक घटना (Chhatrapati Sambhajinagar) समोर आली आहे. एका 8 वर्षांच्या चिमुरडीवर तिच्याच सावत्र पित्याने अमानुष अत्याचार केले असून, या घटनेने संपूर्ण जिल्हा हादरला आहे. हा प्रकार केवळ शारीरिक शोषणापुरता मर्यादित नव्हता, तर त्या नराधमाने मुलीच्या शरीरावर चटक्यांचे 8 ते 10 वण दिले होते, जे पाहून प्रत्यक्षदर्शींचेही डोळे पाणावले.
तिसगाव खवड्या डोंगर वसाहतीत राहणारे हे कुटुंब मजुरी करून आपला उदरनिर्वाह करते. शुक्रवारी सायंकाळी साडेसहाच्या सुमारास घरातून मुलीच्या ओरडण्याचा मोठा आवाज आला. शेजाऱ्यांनी दाखवलेली सतर्कता या मुलीसाठी देवदूत ठरली. त्यांनी तत्काळ घराकडे धाव घेतली तेव्हा ही चिमुरडी अत्यंत दयनीय अवस्थेत आढळली. या घटनेची माहिती मिळताच वाळूज पोलिसांनी वेगाने हालचाली करून फरार होण्याच्या प्रयत्नात असलेल्या आरोपीला ताब्यात घेतले आहे.
मुलीचे आई-वडील दोघेही मद्यपानाचे आहारी गेले असून, त्यामुळे घराकडे आणि मुलांकडे त्यांचे पूर्णपणे दुर्लक्ष होते. जेव्हा आई कामासाठी बाहेर गेली होती, तेव्हा दारूच्या नशेत असलेल्या या सावत्र बापाने हे क्रूर कृत्य केले. यासंदर्भात अधिक पोलीस तपास सुरु आहे.
