Nanded Crime : ता. २४ : नांदेडमध्ये एक अतिशय धक्कादायक आणि लाजिरवाणी घटना समोर आली आहे. एका इंग्रजी माध्यमाच्या शाळेतल्या शिक्षकाने सात वर्षांच्या विद्यार्थिनीवर अत्याचार केल्याचं धक्कादायक प्रकार उघड झाला. हा प्रकार कोणाला सांगू नये म्हणून त्या शिक्षकाने मुलीवर दबावही टाकल्याचं समोर आलं. ही घटना १९ नोव्हेंबरला घडली असून पोलिसांनी आरोपी शिक्षकाला तात्काळ अटक केली आहे. Nanded crime
पिडीत मुलगी दुसऱ्या दिवशी घाबरलेली दिसल्यामुळे तिने शाळेत जायला नकार दिला. त्यामुळे आईने तिला शांतपणे विचारलं, तेव्हा तिने शाळेतील जीके विषयाच्या शिक्षकाने तिच्यावर केलेला अत्याचार आईला सांगितला आणि संपूर्ण प्रकार बाहेर आला. इयत्ता दुसरीत शिकणाऱ्या मुलीवर असा प्रकार घडल्याने परिसरात मोठी खळबळ उडाली आहे.
हा गुन्हा फास्ट ट्रॅक कोर्टात चालवून लवकरात लवकर शिक्षा होईल, असे पोलिसांनी सांगितले. उपविभागीय पोलिस अधिकारी रामेश्वर पैंजणे यांनी आरोपीला ताब्यात घेतल्याची माहिती दिली.
पूर्णा रोड, माधवनगर येथील अक्षरज्ञान पब्लिक स्कूल या इंग्रजी माध्यमातील शाळेत हा प्रकार घडला. शाळेच्या छोट्या मैदानाला सर्व बाजूंनी सीसीटीव्ही नसल्याने नेमका प्रकार कुठे घडला, याबाबत अजूनही चौकशी सुरू आहे.
शहरातील अनेक इंग्रजी माध्यमांच्या शाळा लहान जागेत, पुरेशी सुविधा नसतानाही चालू आहेत. भरमसाठ फी घेतली जाते, पण पालकांनी तक्रार केली तरी त्याकडे फारसं लक्ष दिलं जात नाही. या प्रकरणात भाग्यनगर पोलिसांनी पोक्सो कायद्यातर्गत गुन्हा दाखल केला आहे.
या घटनेमुळे शहरातील शैक्षणिक संस्थांमधील मुलींच्या सुरक्षेचा मुद्दा पुन्हा एकदा समोर आला आहे. अनेक जाणकारांचे म्हणणे आहे की काही शाळा शिक्षकांची नीट चौकशी न करता, केवळ कमी पगारात काम करतील म्हणून त्यांना नोकरी देतात. त्यामुळे अशा घटना वाढत असल्याचं ते सांगतात.
या अमानुष घटनामुळे त्या चिमुरड्या मुलीचं मानसिक जग उद्ध्वस्त झालं आहे. अशा नराधमांना कडक शिक्षा व्हावी आणि पुढे असा प्रकार कुणी करणार नाही, यासाठी पालकांकडून जोरदार मागणी होत आहे.
