Maratha Reservation : छत्रपती संभाजीनगर : शनिवारी माध्यमांशी बोलताना मनोज जरांगे पाटील यांनी हे सरकार २४ तारखेच्या आत काम करणारच, गुलाल उधळायला तयार होणार आहेत. जेव्हा बच्चू भाऊ, धोंदे, चिवटे आणि मी चौघं बसलो होतो तेव्हा म्हणालो २४ तारीख. नंतर मंत्री आले आणि गोंगाटा झाला, ते म्हणाले २ तारीख द्या. शेवटची तारीख २४ डिसेंबरच आहे, या तारखेच्या आतच समाजाचं कल्याण होईल, असा विश्वास जरांगे पाटील यांनी व्यक्त केला आहे.
‘समित्या आणि राज्य मागासवर्ग आयोग यावर तातडीने काम करणार, ही समाजासाठी आनंदाची बाब आहे. सरकार २४ तारखेच्या आत मराठा आरक्षणाचं काम करणारच आहे, गुलाल उधळायला तयार होणार आहेत, असंही जरांगे पाटील म्हणाले. मराठा समाजाचं लेकरू म्हणून सरकार आणि विरोधी पक्षाची काही दुश्मनी नाही. समाजातील लोकांचं कल्याण व्हावं म्हणून भांडतोय. आम्हाला सरसकट आरक्षण पाहिजे, अर्धवट घेणार नाही. मी सरकारच्या बाजूचा नाही जातीच्या बाजूचा आहे,मुख्यमंत्र्यांनी फोन करुन तब्येतीची विचारपूस केली. आमचं काम होणार हा विश्वास आहे, असंही जरांगे पाटील म्हणाले.
मराठा समाजाच्या मुलांचं भविष्य ताकतवान बनवण्यासाठी आणि त्यांची आर्थिक परिस्थीती सुधारण्यासाठी मनोज जरांगे पाटील यांनी नऊ दिवस उपोषण केलं. अखेर दोन दिवसांपूर्वी राज्य सरकाच्या शिष्टमंडळाने मनोज जरांगे पाटील यांची भेट घेऊन मराठा उपोषण थांबवण्याची विनंती केली. आता मनोज जरांगे पाटलांवर छत्रपती संभाजीनगरमध्ये उपचार सुरू आहेत. २४ डिसेंबरपर्यंत सरकारला त्यांनी वेळ दिला आहे. सरकार २४ डिसेंबरच्या आतच मराठा आरक्षण देणार असल्याचा विश्वास व्यक्त केला आहे.
