Latur farmer news : लातूर: लातुरमध्ये शेतमाल बाजारपेठेत आणताना आरटीओ कर्मचाऱ्यांच्या अडवणुकीला शेतकरी कंटाळला आणि त्याने थेट चौकातच सोयाबीनची उधळण केल्याचा प्रकार लातुरमध्ये घडला. शेतकऱ्याने या कृतीच्या माध्यमातून कृषी उत्पन्न बाजार समितीतील कारभारावर व्यक्त नाराजी व्यक्त केली. त्याशिवाय, आमदार अमित देशमुख आणि आमदार धीरज देशमुख यांना जाबही विचारला. शेवटी आंदोलक शेतकऱ्याला पोलिसांनी ताब्यात घेतलं.
लातूर जिल्ह्यातील रेणापूर तालुक्यातील शेरा या गावातील माधव सोनवणे हा शेतकरी लातूर येथे सोयाबीन विक्री साठी आला होता. बाजारपेठेत गाडी घेऊन येताना आरटीओ कर्मचाऱ्यांबरोबर झालेल्या वादामुळे आणि बाजारपेठेत मिळणाऱ्या वागणुकीमुळे शेतकरी संतप्त झाला होता. त्यातून आपला आवाज प्रशासनापर्यंत जावा या उद्देशाने शेतकऱ्याने छत्रपती शिवाजी महाराज चौकात सोयाबीनची बॅग उघडत सोयाबीन उधळून देत आपला संताप व्यक्त केला आहे.
सोयाबीनला भाव नसल्यामुळे शेतकरी संकटात सापडला आहे. त्यातच शेतमाल बाजारपेठेत घेऊन येताना आरटीओ ऑफीसमधील कर्मचारी त्रास देत असतात. गाड्या अडवून दंड मागितला जात आहे. यात शेतकऱ्यांचे आर्थिक नुकसान मोठ्या प्रमाणावर होत आहे. गाड्या ओव्हरलोड असणे, पार्किंगला योग्य जागा नसणे, कृषी उत्पन्न बाजार समितीकडून सहकार्य न मिळणे अशा प्रत्येक ठिकाणी शेतकऱ्याची आर्थिक अडवणूक आणि लुबाडेगिरी सुरू आहे. यात शेतकरी संपूर्णपणे कोलमडून पडत आहे. यामुळे संतप्त झालेल्या एका शेतकऱ्याने लातूर शहरातील मुख्य चौक असलेला छत्रपती शिवाजी महाराज चौकामध्ये गाडी थांबून सोयाबीनची बॅग भर रस्त्यावर ठेवली. यातील सोयाबीन रस्त्यावर टाकत या शेतकऱ्यांना आपला संताप व्यक्त केला.
