छत्रपती संभाजीनगर: शहरातून संतापजनक आणि माणुसकीला काळीमा फासणारी घटना उघडकीस आली आहे. मोबाईल हरवल्याची तक्रार देण्यासाठी पोलीस ठाण्यात आलेल्या 23 वर्षीय तरुणीला लग्नाचे आमिष दाखवून, 58 वर्षीय पोलीस उपनिरीक्षकाने तिच्यावर वर्षभर अत्याचार केल्याचा धक्कादायक प्रकार समोर आला आहे. (Chhatrapati Sambhajinagar Crime)
या प्रकरणी संशयित पोलीस उपनिरीक्षक सुभाष चव्हाण, त्याची पत्नी आणि मुलावर क्रांती चौक पोलीस ठाण्यात गुन्हा दाखल करण्यात आला आहे.
नेमकी घटना काय?
मिळालेल्या माहितीनुसार, पीडित तरुणी मूळची नांदेडची असून ती पुण्यात एका खाजगी कंपनीत नोकरी करते. 7 मार्च 2025 रोजी तिचा मोबाईल हरवल्याने ती तक्रार देण्यासाठी छत्रपती संभाजीनगरमधील क्रांती चौक पोलीस ठाण्यात गेली होती. तिथे तिची भेट पीएसआय सुभाष चव्हाण याच्याशी झाली. तक्रार नोंदवण्याच्या बहाण्याने चव्हाणने तिचा नंबर मिळवला आणि ‘नंबर कन्फर्म करायचा आहे’ असे सांगून तिला फोन करण्यास सुरुवात केली.
हळूहळू त्याने मदतीचा बहाणा करून तरुणीचा विश्वास संपादन केला आणि तिला प्रेमाच्या जाळ्यात ओढले. पीडितेचा आरोप आहे की, चव्हाणने तिला लग्नाचे खोटे आमिष दाखवून शहरातील विविध लॉजवर नेऊन तिच्यावर अत्याचार केले. इतकेच नाही तर, तिला बनावट मंगळसूत्र बांधून ‘तू माझी पत्नी आहेस’ असे भासवले.
तीन वेळा सक्तीने गर्भपात
तक्रारीनुसार, 7 मार्च 2025 ते 18 फेब्रुवारी 2026 या कालावधीत हा अत्याचाराचा सिलसिला सुरू होता. या दरम्यान पीडिता गर्भवती राहिली असता, तिची इच्छा नसतानाही आरोपीने पुणे आणि संभाजीनगर येथे तिचा तीन वेळा गर्भपात घडवून आणला. जेव्हा पीडितेने लग्नासाठी तगादा लावला, तेव्हा आरोपीने तिला जातीवाचक शिवीगाळ करत मारहाण करण्यास सुरुवात केली.
कुटुंबियांकडूनही मारहाण आणि धमकी
या संपूर्ण प्रकरणाची माहिती आरोपीची पत्नी नर्मदा चव्हाण आणि मुलगा सागर चव्हाण यांना मिळताच, त्यांनीही पीडितेला धमकावण्यास सुरुवात केली. 28 जानेवारी रोजी आरोपीच्या पत्नीने पीडितेला “माझ्या पतीचा पाठलाग सोड आणि गर्भपात कर” असे म्हणत मारहाण केली. यावेळी झालेल्या झटापटीत आणि मुलाने केलेल्या मारहाणीत पीडितेचा दीड महिन्याचा गर्भपात झाल्याचेही तक्रारीत नमूद करण्यात आले आहे.
शारीरिक आणि मानसिक छळाची परिसीमा गाठल्यानंतर पीडितेने अखेर हिंमत एकवटून पोलिसांत धाव घेतली. या गंभीर तक्रारीची दखल घेत पोलिसांनी पीएसआय सुभाष चव्हाण, त्याची पत्नी आणि मुलावर विविध कलमान्वये गुन्हा दाखल केला आहे.
या घटनेमुळे पोलीस दलात मोठी खळबळ उडाली असून, वरिष्ठ पोलीस अधिकारी या प्रकरणाचा सखोल तपास करत आहेत.
