बीड: महाराष्ट्राच्या राजकारणात नेहमीच आपल्या स्पष्ट आणि ठाम विधानांमुळे चर्चेत राहणारे भाजप आमदार गोपीचंद पडळकर (BJP MLA Gopichand Padalkar) पुन्हा एकदा वादाच्या भोवऱ्यात सापडले आहेत. बीड जिल्ह्यातील एका सार्वजनिक सभेत त्यांनी केलेल्या वक्तव्यामुळे राज्यातील राजकारण तापण्याची शक्यता आहे.
वादग्रस्त विधानामुळे खळबळ
सभेला संबोधित करताना त्यांनी हिंदू मुलींना उद्देशून म्हटलं –
“ज्या जिममध्ये ट्रेनर कोण आहे हे माहित नाही, अशा ठिकाणी हिंदू मुलींनी जाऊ नये. घरी योगा (Yoga) करणेच अधिक चांगले आहे. हे किती मोठं षड्यंत्र आहे, याची कल्पना तुम्हाला नाही. म्हणून मुलींनी घरातच व्यायाम (Exercise) करावा.”
या वक्तव्यानंतर त्यांच्या विधानाची सोशल मीडियावर मोठी चर्चा सुरू झाली आहे.
कॉलेज आणि ओळखपत्रांबाबत मत
पडळकर यांनी यावेळी शिक्षणसंस्थांबाबतही भूमिका स्पष्ट केली. ते म्हणाले, “महाविद्यालयांमध्ये कोणतीही व्यक्ती ओळखपत्राशिवाय (ID Card) प्रवेश करत असल्यास त्यावर त्वरित कारवाई व्हावी. यासाठी एक मजबूत आणि सुरक्षित प्रणाली तयार करणे आवश्यक आहे.”
अहिल्यानगर नामकरणावर विरोधकांना टोला
दरम्यान, प्रसारमाध्यमांशी बोलताना त्यांनी विरोधकांवर हल्ला चढवला.
“बारकी मुलं रडल्यासारखं आव आणत आहेत. आपण कायद्याच्या देशात राहतो. त्यामुळे आता ‘अहिल्यानगर’ (Ahilyanagar) नाव लिहिलं जाईलच , मग ते कपाळावर असो किंवा दाखल्यावर अहिल्यानगर’ नाव लिहावेच लागणार ,” असे पडळकर म्हणाले.
गावांची नावे बदलण्याची मागणी
मुघल आणि औरंगजेब यांच्याशी संबंधित गावांची नावे बदलण्याची मागणी भाजप आमदार गोपीचंद पडळकर यांनी केली. बीड जिल्ह्यातील ‘जहांगीर मोहा’ या गावाचं नावही बदललं पाहिजे, असं सांगत त्यांनी मुख्यमंत्र्यांना (CM) लवकरच पत्र देऊन “दणक्यात” कारवाई करण्याचं संकेत दिले.
आमदार पडळकर यांच्या या विधानांमुळे विरोधकांकडून जोरदार प्रतिक्रिया उमटत आहेत. सोशल मीडियावरही या वक्तव्याचा व्हिडिओ वेगाने व्हायरल होत असून राज्यात नव्या वादाला तोंड फुटण्याची शक्यता आहे.
