पुणे: दिवाळीच्या पार्श्वभूमीवर अन्न व औषध प्रशासनाने (FDA) भेसळ करणाऱ्यांवर मोठी धडक मोहीम राबवली आहे. नागरिकांच्या आरोग्याचे रक्षण आणि सुरक्षित अन्नाचा संकल्प म्हणून “सण महाराष्ट्राचा, संकल्प अन्न सुरक्षिततेचा” या अभियानांतर्गत ही मोहीम सुरू करण्यात आली. या कारवाईत तब्बल ₹1.97 कोटी किंमतीचा भेसळयुक्त साठा जप्त करण्यात आला आहे. नागरिकांची सुरक्षितता लक्षात घेऊन ही कारवाई अन्न व औषध प्रशासन मंत्री नरहरी झिरवळ यांच्या मार्गदर्शनाखाली पार पडली.
तपासणीचा आढावा:
या मोहिमेत एकूण 353 अन्न आस्थापनांची तपासणी करण्यात आली. त्यापैकी नियमांचे उल्लंघन करणाऱ्या 196 आस्थापनांना सुधारणा नोटीस (Improvement Notice) देण्यात आली आहे. अन्नपदार्थांचे 654 नमुने तपासणीसाठी घेतले गेले.
प्राप्त झालेल्या 216 अहवालांपैकी,
-
190 नमुने प्रमाणित
-
5 नमुने कमी दर्जाचे
-
8 बनावट (Misbranded)
-
13 असुरक्षित (Unsafe)
विभागाने दोषींवर कायद्यानुसार पुढील कठोर कारवाई सुरू असल्याचे स्पष्ट केले आहे. मार्केटमध्ये ड्रायफ्रुट्सवरील रासायनिक प्रक्रियेचा प्रकार उघड झाला आहे. Diwali2025 निमित्ताने वाढलेल्या मागणीचा फायदा घेत काही व्यापारी रासायनिक द्रावण व रंगांचा वापर करून मनुका आणि बदाम यांसारख्या ड्रायफ्रुट्सला कृत्रिम चमक देत असल्याचे समोर आले आहे. पुणे विभागाचे सहआयुक्त सुरेश अन्नपुरे यांनी नागरिकांना भेसळयुक्त अन्नपदार्थांपासून दूर राहण्याचं आवाहन केलं आहे. त्यांनी सांगितलं की, “अन्नपदार्थात भेसळ असल्याची शंका आल्यास नागरिकांनी टोल-फ्री क्रमांक 1800222365 वर संपर्क साधावा.”
