Local Body Elections: राज्यातील स्थानिक स्वराज्य संस्थांच्या निवडणुका तोंडावर असतांना आरक्षणाच्या 50% मर्यादेचा वाद सर्वोच्च न्यायालयात पोहोचला आहे. राज्यात अनेक ठिकाणी आरक्षणाची मर्यादा ओलांडल्याने या प्रकरणी न्यायालय आज काय निकाल देणार याकडे संपूर्ण राज्याचे लक्ष लागले होते.
आज झालेल्या सुनावणीत सरन्यायाधीश सूर्यकांत यांच्या खंडपीठाने आज कोणताही अंतिम निर्णय दिला नाही. ही महत्त्वपूर्ण सुनावणी आता पुढे ढकलण्यात आली असून, शुक्रवार, 28 डिसेंबर रोजी या प्रकरणी पुन्हा सुनावणी होणार आहे. कोर्ट पुढील सुनावणीत काही महत्त्वाचे अंतरिम निर्देश देण्याची शक्यता आहे.
“संख्या किती आहे, त्यानुसार प्रतिनिधित्व कसं देता येईल, यावर आम्ही निश्चितपणे निर्णय देऊ.”, असे आजच्या सुनावणीदरम्यान सरन्यायाधीश सूर्यकांत यांनी सांगितले.
दरम्यान, कोर्टाने यापूर्वीच 50% आरक्षण मर्यादा पाळण्याचे निर्देश दिले होते. या कायदेशीर प्रक्रियेमुळे गेल्या अनेक वर्षांपासून विविध निवडणुका स्थगित होत्या, त्यामुळे न्यायालयाच्या अंतिम निर्णयाकडे सर्वांचे लक्ष लागले आहे.
शुक्रवारी सुप्रीम कोर्ट कोणते अंतरिम निर्देश देते, यावर निवडणुकांची पुढील प्रक्रिया अवलंबून आहे. दरम्यान, कोर्टाचा अंतिम निर्णय येईपर्यंत कोणताही निवडणूक कार्यक्रम जाहीर न करण्याचा निर्णय राज्य निवडणूक आयोगाने घेतला आहे.
