पेण : पेण तालुक्यातील काश्मिरे येथील लक्ष्मण म्हात्रे यांच्या घरातील दागिन्यांवर डल्ला मारून अज्ञात चोरट्यांनी जवळपास अडीच लाखांचे दागिने चोरून नेले. पोलिसांनी दिलेल्या माहितीनुसार, काश्मिरे येथे राहणारे लक्ष्मण म्हात्रे हे पाटणेश्वर येथे त्यांच्या भावाकडे सत्यनारायणाच्या पूजेनिमित्ताने मुलगा व मुलीला घेऊन गेले होते. तर त्यांची पत्नी काही कारणास्तव घरी होती. दरम्यान, ती सकाळी घराला टाळा लावून शेतावर गेली होती.
ही संधी साधत अज्ञात चोरट्याने त्यांच्या घराच्या खिडकीतून घरात प्रवेश केला व शोकेशच्या एका ड्रॉवरमध्ये ठेवलेले सोन्याचे दागिने चोरून नेले. यात ५ तोळ्याचे सोन्याचे गंठण, १५ ग्रॅमचे कानातील झुमके, एक तोळ्याची सोन्याची चेन व इतर दागिने असा एकूण २ लाख ५५ हजारांचा ऐवज चोरून नेला.” याप्रकरणी पेण पोलीस ठाण्यात म्हात्रे यांनी दिलेल्या तक्रारीवरून अज्ञात चोरट्यांविरोधात गुन्हा दाखल करण्यात आला असून पुढील तपास पोलीस करत आहेत.
