महाड: राज्यात सुरू असलेल्या नगरपरिषद (Mahad Nagarparishad Election) आणि नगरपंचायत (Mahad News) निवडणुकीच्या (Bharat Gogavale) मतदानाला महाडमध्ये मोठे गालबोट लागले आहे. महाडमध्ये भरत गोगावले आणि सुनील तटकरे यांच्या समर्थकांमध्ये जोरदार राडा झाला. दोन्ही बाजूंच्या कार्यकर्त्यांनी एकमेकांना भिडत मारहाण केली आणि अनेक वाहनांच्या काचा फोडल्या. त्यामुळे मतदानाच्या दिवशी तणावपूर्ण वातावरण निर्माण झाले.
घटना अशी की भरत गोगावले यांचे पुत्र विकास गोगावले हे महाडमधील एका मतदान केंद्रावर कार्यकर्त्यांना भेटण्यासाठी गेले होते. त्याचवेळी नुकतेच शिंदे गटातून अजित पवार यांच्या राष्ट्रवादीमध्ये गेलेल्या सुशांत जाबरे यांच्या समर्थकांसोबत त्यांचा सामना झाला. बाचाबाची वाढताच दोन्ही बाजूंच्या कार्यकर्त्यांमध्ये मोठा राडा झाला.
विकास गोगावले यांनी माध्यमांशी बोलताना गंभीर आरोप केले. त्यांनी सांगितले की हा हल्ला सुनील तटकरे यांनी करवून घेतला आहे. त्यांच्या म्हणण्यानुसार, एका फॉर्च्युनर आणि स्कॉर्पिओ गाडीतून आलेल्या लोकांनी त्यांच्यावर हल्ला करण्याचा प्रयत्न केला आणि त्यातील एकाने त्यांच्या दिशेने रिव्हॉल्व्हर रोखली. मात्र त्यांच्याच कार्यकर्त्याने प्रसंगावधान राखत ती रिव्हॉल्व्हर हिसकावून घेतल्यामुळे मोठा अनर्थ टळला.
विकास यांनी सांगितले की त्या व्यक्तीला त्यांच्या अंगरक्षकाने बाजूला ढकलले आणि स्वतःच्या जीवावर उदार होऊन कार्यकर्त्याने पिस्तूल काढून घेतले. त्यांनी असा दावा केला की हल्लेखोरांची गर्दी आंध्र प्रदेश, दिल्ली आणि कोलकाता या भागांतून आणलेली असल्याचे त्यांच्या चेहऱ्यांवरून जाणवत होते. त्यांच्या मते हल्लेखोरांकडे स्टम्प आणि हॉकी स्टीकदेखील होत्या.
या प्रकारामुळे मोठी खळबळ उडाली असून विकास गोगावले आता पोलीस ठाण्यात गुन्हा दाखल करण्यासाठी निघाले आहेत. पोलीस कोणावर गुन्हा नोंदवतात आणि या तणावपूर्ण घटनेचा पुढील तपास कसा होतो, याकडे राज्याचे लक्ष लागले आहे.
