Crime News: पालघर : पालघर जिल्ह्यातील नालासोपारा परिसरात पोलिसांनी मोठी शोध मोहीम राबवत 250 हून अधिक नायजेरियन नागरिकांना ताब्यात घेतले आहे. या कारवाईचा उद्देश संबंधित नागरिक भारतात कायदेशीररित्या राहत आहेत का याची पडताळणी करणे हा होता. आठवडाभर त्यांच्या कागदपत्रांची तपासणी केल्यानंतर सुमारे 150 जणांचे पासपोर्ट आणि व्हिसाची मुदत संपलेली असल्याचे समोर आले. त्यामुळे ते बेकायदेशीररीत्या वास्तव्यास असल्याची माहिती पोलिसांनी दिली.
तपासात आढळलेल्या नागरिकांना पुढील प्रक्रियेसाठी डिटेंशन सेंटरमध्ये हलविण्यात येणार आहे. त्यानंतर त्यांना त्यांच्या देशात परत पाठवण्याची कार्यवाही केली जाणार असल्याचे अधिकाऱ्यांनी सांगितले. नालासोपारा पूर्वेतील प्रगती नगर, मोरेगाव, ओम नगर आणि रेहमत नगर या भागात मोठ्या संख्येने परदेशी नागरिक राहत असल्याची माहिती समोर आली आहे. काही जण अनधिकृत इमारतींमध्ये कमी भाड्याने राहत असल्याचेही तपासात आढळले.
या परिसरात अंमली पदार्थांशी संबंधित गुन्ह्यांचे प्रमाण वाढत असल्याचा दावा पोलिसांनी केला आहे. मागील 5 वर्षांत अंमली पदार्थ तस्करीच्या प्रकरणांत अनेक परदेशी नागरिकांवर कारवाई करण्यात आल्याचे सांगण्यात आले. विविध छाप्यांमध्ये मोठ्या प्रमाणात अंमली पदार्थ जप्त करण्यात आले आहेत.
दरम्यान, स्थानिक रहिवाशांनी परिसरातील सुरक्षेबाबत चिंता व्यक्त केली आहे. रात्रीच्या वेळी संशयास्पद हालचाली वाढल्याची तक्रार करण्यात आली आहे. पोलिसांनी यापूर्वीही काही ठिकाणी कारवाई केली होती, मात्र तक्रारी पुन्हा समोर येत असल्याचे सांगितले जाते.
ही मोहीम 10 फेब्रुवारी रोजी रात्री सुरू करण्यात आली. पोलीस आयुक्त निकेत कौशिक यांच्या मार्गदर्शनाखाली आणि झोन 2 च्या पोलीस उपायुक्त पौर्णिमा चौगुले-श्रृंगी यांच्या देखरेखीखाली मोठ्या पोलिस बंदोबस्तात ही कारवाई करण्यात आली. बुधवारी दुपारपर्यंत ही तपास मोहीम सुरू होती.
