Crime News : रत्नागिरी : चिपळूण तालुक्यातील देवखेरकी गावात एक धक्कादायक प्रकार समोर आला असून हापूस आंब्याच्या बागेत मानवी हाडांचा जळालेला सांगाडा आढळून आला आहे. या घटनेमुळे संपूर्ण परिसरात भीतीचे वातावरण निर्माण झाले आहे. प्राथमिक माहितीनुसार, मृतदेह निळ्या रंगाच्या बॅगेत भरून जाळण्याचा प्रयत्न करण्यात आल्याचा संशय व्यक्त केला जात आहे.
मिळालेल्या माहितीनुसार, हा प्रकार सुमारे दीड महिन्यांपूर्वी घडला असावा. बागेत काम करणाऱ्या एका मजुराला त्यावेळी हा मृतदेह दिसला होता. मात्र भीतीमुळे त्याने ही माहिती कोणालाही दिली नव्हती. अखेर मनावरचा ताण सहन न झाल्याने त्याने बाग मालकाला याबाबत सांगितले. त्यानंतर हा प्रकार उघडकीस आला.
घटनेची माहिती मिळताच चिपळूण पोलीस घटनास्थळी दाखल झाले. दीड महिना उलटल्यामुळे मृतदेह पूर्णपणे जळून फक्त सांगाडा शिल्लक राहिला आहे. घटनास्थळी जळालेल्या निळ्या बॅगेचे अवशेष आणि लोखंडी रॉड सापडले असून त्यांचा या घटनेशी संबंध असण्याची शक्यता व्यक्त केली जात आहे.
प्राथमिक अंदाजानुसार हा सांगाडा 12 ते 13 वर्षांच्या मुलगा किंवा मुलीचा असू शकतो. ओळख पटवण्यासाठी हाडांचे नमुने तपासणीसाठी पाठवण्यात आले आहेत. या प्रकरणाचा तपास सुरू असून आरोपीचा शोध घेणे पोलिसांसमोर मोठे आव्हान ठरत आहे.
या घटनेमुळे परिसरात भीती आणि संतापाचे वातावरण असून पोलिसांकडून सखोल तपास सुरू आहे.
